ඩේවිඩ් එලිසන්ගේ නායකත්වයෙන් යුත් පැරමවුන්ට් සමාගම සහ වෝනර් බ්‍රදර්ස් ඩිස්කවරි අතර සිදුවීමට නියමිත ඩොලර් බිලියන 111ක ඒකාබද්ධ වීමේ ගිවිසුමට එරෙහිව නීතිපතිවරුන් ගෙන යන නීතිමය ක්‍රියාමාර්ග නිසා පැරමවුන්ට් සමාගම කැලිෆෝනියාවෙන් ඉවත් වීමට සූදානම් වන බවට තොරතුරු වාර්තා වෙනවා. ලොස් ඇන්ජලීස් ප්‍රාන්තයේ ආර්ථික සංවර්ධන සංස්ථාව නිකුත් කළ වාර්තාවකට අනුව, සමාගම එලෙස ඉවත් වුවහොත් කැලිෆෝනියාවේ රැකියා දස දහස් ගණනක් අහිමි වී, වාර්ෂිකව ඩොලර් බිලියන ගණනක ආර්ථික පාඩුවක් සිදුවිය හැකි බව අනතුරු අඟවා තිබෙනවා. මෙය ප්‍රාන්තයේ ආර්ථිකයට ඉතා බරපතළ තත්වයක් බවයි පැවසෙන්නේ.
පැරමවුන්ට් සමාගම මෙම ගිවිසුම සම්බන්ධයෙන් පවතින නීතිමය ගැටලු විසඳා ගැනීමට ඔක්තෝබර් 1 වනදා දක්වා කාලයක් ලබා දී ඇති අතර, එතෙක් එකඟතාවයකට පැමිණීමට නොහැකි වුවහොත් ඔවුන් කැලිෆෝනියාව හැර යාමේ සූදානමක සිටින බවයි වාර්තා වෙන්නේ. එලිසන්ගේ පාර්ශ්වය පවසන්නේ මෙම ඒකාබද්ධ වීම සම්බන්ධයෙන් නීතිමය බාධක පැනවීම අසාධාරණ බවයි. කෙසේ වෙතත්, හොලිවුඩ් කර්මාන්තයේ වසර 100ක ඉතිහාසයක් ඇති ප්‍රධාන සමාගමක් මෙලෙස ඉවත් වීමෙන් ප්‍රාන්තයේ රැකියා වෙළඳපොළට සහ ආර්ථිකයට සිදුවන හානිය අතිමහත් වනු ඇති බව ආර්ථික විශේෂඥයින් පෙන්වා දෙනවා. දැනටමත් පසුගිය වසර කිහිපය තුළ රැකියා විශාල ප්‍රමාණයක් අහිමි වී ඇති ප්‍රදේශයකට මෙය තවත් දරාගත නොහැකි පහරක් වනු ඇති බවයි වැඩිදුරටත් සඳහන් වන්නේ.
Discussion & Feedback