නව දශකයේ අතිශය ජනප්‍රිය වුණු ‘හෝම් ඉම්පෲව්මන්ට්’ (Home Improvement) ටෙලි කතාමාලාවේ ප්‍රධාන චරිත රඟපෑ නළු නිළියන් පිරිසක් මෑතකදී නැවත හමුවී තිබෙනවා. එහි මවගේ චරිතයට පණ පෙවූ පැට්‍රීෂියා රිචඩ්සන් තම තිරයේ පුතුන් ලෙස රඟපෑ ජොනතන් ටේලර් තෝමස් සහ ටාරන් නෝවා ස්මිත් සමඟ ගත් සුන්දර ඡායාරූපයක් සමාජ මාධ්‍යයට එක් කර තිබුණා. ඇය ඔවුන්ව හඳුන්වා තිබුණේ ‘මගේ අනිත් පුතුන්’ යන ආදරණීය නමින්. වසර ගණනාවකට පසු ඔවුන් මෙලෙස එකට දැකගන්න ලැබීම රසිකයන්ට නම් ලොකු සතුටක් වුණා.
කෙසේ වෙතත්, මෙම කතාමාලාව නැවත ආරම්භ කිරීමේ (reboot) බලාපොරොත්තුවක් තවමත් පවතින බව පෙනෙන්නට නැහැ. මීට පෙර එහි පියාගේ චරිතය රඟපෑ ටිම් ඇලන් පවසා තිබුණේ, නළු පිරිස අතර පවතින පෞද්ගලික ගැටලු නිසා එය ඉදිරියට ගෙන යාම අභියෝගයක් වී ඇති බවයි. විශේෂයෙන්ම, ඔවුන්ගේ වැඩිමහල් පුතු ලෙස රඟපෑ සැචරි ටයි බ්‍රයන් මේ වන විට නීතිමය ගැටලු කිහිපයක් නිසා සිරගතව සිටින අතර, අනෙක් පුතුන් දෙදෙනාද රංගන ක්ෂේත්‍රයෙන් ඉවත් වී සිටිනවා. පැට්‍රීෂියා රිචඩ්සන් පවසන්නේ තමන්ට නම් නැවත මෙම කතාමාලාවට සම්බන්ධ වීමේ අදහසක් නැති බවයි.
කතාමාලාව නැවත ආරම්භ කිරීම ගැන ටිම් ඇලන් මාධ්‍යයට අදහස් දක්වා තිබුණත්, ඒ ගැන තමන් සමඟ කිසිදු සාකච්ඡාවක් සිදු කර නොතිබීම පුදුමයට කරුණක් බවත් ඇය සඳහන් කරනවා. කෙසේ වෙතත්, තිරයෙන් පිටත ඔවුන් අතර පවතින මෙම මිත්‍රත්වය රසිකයන් අතර බොහෝ කතාබහට ලක්ව තිබෙනවා.
Discussion & Feedback