කැලිෆෝනියාවේ මවුන්ට් ශාස්තා කඳු පන්තිය තරණය කිරීමට ගිය තරුණයින් තිදෙනෙකුට ගූගල් ජෙමිනායි (Gemini) කෘත්රිම බුද්ධි තාක්ෂණය මත විශ්වාසය තැබීම නිසා බරපතල අකරතැබ්බයකට මුහුණ දීමට සිදුවුණා. උදෑසන 3ට සිය ගමන ආරම්භ කළ ඔවුන්, නියමිත වේලාවට කන්ද මුදුනට ළඟා වීමට නොහැකි වුවත්, රාත්රී 7 වන විට කඳු මුදුනට ළඟා වී තිබෙනවා. පසුව අඳුරේ පහළට බැසීමට උත්සාහ කිරීමේදී මග වරදවා ගත් ඔවුන්ට අවසානයේ මඩ් ක්රීක් කැනියොන් ප්රදේශයේ රාත්රිය ගත කිරීමට සිදු වුණා. පසුදින උදෑසන වන විට වන සංරක්ෂණ නිලධාරීන් සහ ස්වේච්ඡා සේවකයින් එක්ව ඔවුන්ව බේරා ගැනීමට සමත් වුණා.
මෙම සිදුවීම සම්බන්ධයෙන් අදහස් දක්වන සිස්කියු ප්රාන්තයේ ෂෙරිෆ් කාර්යාලය පවසන්නේ, මෙම තරුණයින්ට අවශ්ය ආහාර සහ ජලය ප්රමාණය ඉතා අඩුවෙන් රැගෙන යන ලෙස ජෙමිනායි විසින් උපදෙස් ලබා දී තිබූ බවයි. සැලසුම් කළ පැය 8ක ගමන දින කිහිපයක් දක්වා ඇදී යාමත් සමඟ ඔවුන් දැඩි අපහසුතාවයට පත් වුණා. කෘත්රිම බුද්ධි තාක්ෂණය මත පමණක් පදනම් වී මෙවැනි දුෂ්කර ගමන් සැලසුම් කිරීම ඉතා අවදානම් සහගත බවත්, ඕනෑම කඳු නැගීමකට පෙර අදාළ ප්රදේශයේ වන සංරක්ෂණ කාර්යාලයෙන් නිවැරදි තොරතුරු ලබා ගැනීම අත්යවශ්ය බවත් බලධාරීන් අවධාරණය කරනවා. තාක්ෂණය දියුණු වුවත්, ස්වභාවධර්මය සමඟ ගනුදෙනු කිරීමේදී මිනිස් බුද්ධිය සහ නිවැරදි සැලසුම් කිරීම තවමත් ඉතා වැදගත් බව මෙම සිදුවීමෙන් අපට හොඳින්ම පැහැදිලි වෙනවා.

Discussion & Feedback