හිටපු හොලිවුඩ් චිත්‍රපට නිෂ්පාදක හාවි වයින්ස්ටීන් මේ වන විට බරපතල සෞඛ්‍ය ගැටලු කිහිපයක් හේතුවෙන් රෝහල්ගත කර තිබෙනවා. ඔහුට හුස්ම ගැනීමේ දැඩි අපහසුතා මතු වීම නිසා වහාම රෝහල් ගත කිරීමට පියවර ගෙන ඇති අතර, ඉදිරි සති කිහිපය පුරාම ඔහුට රෝහලේ නේවාසිකව ප්‍රතිකාර ගැනීමට සිදුවනු ඇති බවයි ඔහුගේ නියෝජිතයන් පවසන්නේ. නිව්යෝර්ක්හි රයිකර්ස් අයිලන්ඩ් බන්ධනාගාරයේ රඳවා සිටියදී ඔහුගේ සෞඛ්‍ය තත්ත්වය හදිසියේම පිරිහී ඇති අතර, වාර්තා වන පරිදි නියුමෝනියාව හේතුවෙන් ඇති වූ හෘද අකර්මණ්‍ය වීමක් නිසා ඔහු මේ වන විට මැන්හැටන්හි බෙල්වෙව් රෝහලේ බන්ධනාගාර වාට්ටුවේ ප්‍රතිකාර ලබමින් ඉන්නවා.
වයස අවුරුදු 74ක් වන වයින්ස්ටීන් ලිංගික අපරාධ සම්බන්ධයෙන් වරදකරු වී බන්ධනාගාරගතව සිටින අයෙක්. ඔහුට එරෙහිව පවතින නඩු විභාග තවමත් ක්‍රියාත්මක වන අතර, සැප්තැම්බර් මාසයේදී ඔහුට දඬුවම් නියම කිරීමට නියමිතව තිබෙනවා. මීට පෙර අවස්ථා කිහිපයකදීම ඔහු විවිධ සෞඛ්‍ය ගැටලුවලට මුහුණ දී තිබුණත්, මෙවර තත්ත්වය තරමක් බරපතල බවයි වාර්තා වෙන්නේ. කෙසේ වෙතත්, ඔහුට එරෙහිව ගොනු කර තිබූ තවත් දූෂණ චෝදනාවක් ඉදිරියට ගෙන නොයාමට නිව්යෝර්ක් නීතිපතිවරුන් මෑතකදී තීරණය කළා. කෙසේ වෙතත්, කැලිෆෝනියාවේ සහ නිව්යෝර්ක්හි ඔහුට එරෙහිව පවතින අනෙකුත් නඩු තීන්දුවල කිසිදු වෙනසක් සිදුවී නැහැ.
Discussion & Feedback