ලොව පුරා රසිකයන් නොඉවසිල්ලෙන් බලා සිටින HBO හි හැරී පොටර් කතාමාලාවේ දෙවන අදියර සඳහා ප්‍රධාන චරිත කිහිපයකට නව නළු නිළියන් පිරිසක් මේ වන විට තෝරාගෙන තියෙනවා. ඒ අනුව, තරුණ වෝල්ඩමෝර් හෙවත් ටොම් රිඩ්ල්ගේ චරිතයට ජාත්‍යන්තර එමී සම්මානලාභී බිලී බැරට්ව තෝරාගෙන තියෙනවා. ඒ වගේම, රසිකයන්ගේ ආදරය දිනාගත් ඩොබීගේ චරිතයට ලෙනී රෂ්ව එක් කරගෙන තිබීම විශේෂත්වයක්. රොන් වීස්ලිගේ සහෝදරිය වන ජිනී වීස්ලිගේ චරිතයට බොනී හිල්ව අලුතින් එක් කරගෙන තියෙනවා.
මෙම දෙවන අදියරේදී හැරී පොටර් සහ රහස් කුටිය පොතේ සිදුවීම් මාලාව අන්තර්ගත වන අතර, එහිදී ජිනී වීස්ලිගේ චරිතය වඩාත් කැපී පෙනෙනවා. විශේෂයෙන්ම ටොම් රිඩ්ල්ගේ රහස් දිනපොත සමඟ ජිනී සම්බන්ධ වන ආකාරය මෙහිදී දැකගන්න පුළුවන්. මීට අමතරව, ගිල්ඩරෝයි ලොක්හාර්ට්ගේ චරිතයට කිට් හැරින්ටන් එක්වන බවත් දැනටමත් තහවුරු කරලා තියෙනවා. පළමු අදියරේ රඟපෑ ප්‍රධාන නළු නිළියන් වන ඩොමිනික් මැක්ලොක්ලින්, ඇලස්ටෙයාර් ස්ටවුට් සහ අරාබෙල්ලා ස්ටැන්ටන් ඇතුළු පිරිස මෙම කතාමාලාව පුරාම අපට දැකගන්න පුළුවන්.
මෙම කතාමාලාවේ රූගත කිරීම් මේ වසරේ අගභාගයේදී ආරම්භ කිරීමට නියමිතයි. පළමු අදියර නත්තල් සමයේදී විකාශය වීමට නියමිත අතර, දෙවන අදියරේදී කතාවේ තවත් අඳුරු සහ ගුප්ත පැතිකඩයන් රැසක් රසිකයන්ට අත්විඳින්න ලැබෙනු ඇති බවයි නිෂ්පාදකවරුන් පවසන්නේ. ජේ.කේ. රෝලිංගේ මැජික් ලෝකය නැවතත් අලුත් මුහුණුවරකින් රසිකයන් අතරට ඒම ගැන බොහෝ දෙනා මේ වන විටත් විශාල උනන්දුවකින් පසුවෙනවා.
Discussion & Feedback