ඇමරිකානු ආරක්ෂක දෙපාර්තමේන්තුවේ දත්ත ගබඩාවකට එල්ල වූ සයිබර් ප්රහාරයකින් හමුදා සාමාජිකයින් ලක්ෂ ගණනාවකගේ පෞද්ගලික තොරතුරු කාන්දු වී තිබෙනවා. 2025 ඔක්තෝබර් මාසයේ සිට 2026 ජූලි මාසය දක්වා කාලය තුළ මෙම දත්ත සොරාගෙන ඇති අතර, මෙයට ජීවතුන් අතර සිටින මිලියන 2.8ක පිරිසක් සහ මියගිය පුද්ගලයින් 300,000ක් පමණ ඇතුළත් බවයි වාර්තා වෙන්නේ. හැකර්වරුන් විසින් මෙම පද්ධතියේ තිබූ ආරක්ෂක දුර්වලතාවයක් උපයෝගී කරගනිමින් සමාජ ආරක්ෂණ අංක, උපන් දින සහ හමුදා සේවයට අදාළ රහසිගත තොරතුරු රැසක් ලබාගෙන තිබෙනවා. විශේෂයෙන්ම මෙම දත්ත කිසිදු සංකේතනයකින් (Encryption) තොරව ගබඩා කර තිබීම විශාල ගැටලුවක් බවයි තාක්ෂණික විශේෂඥයින් පවසන්නේ.
මෙම සිදුවීම ඇමරිකානු රජයේ ආයතන ඉලක්ක කරගෙන මෑතකදී සිදුවූ දරුණුතම සයිබර් ප්රහාරවලින් එකක් ලෙස සැලකෙනවා. මීට පෙර FBI ආයතනයට එල්ල වූ ප්රහාරයකින්ද නිලධාරීන්ගේ දත්ත විශාල ප්රමාණයක් සොරාගෙන තිබූ අතර, මෙවැනි තොරතුරු විදේශීය බුද්ධි අංශ අතට පත්වීමෙන් ජාතික ආරක්ෂාවට බරපතල තර්ජනයක් එල්ල විය හැකි බවට අනතුරු ඇඟවීම් සිදු කර තිබෙනවා. දැනට මෙම දත්ත අනිසි ලෙස භාවිතා කර ඇති බවට සාක්ෂි නොමැති බව ආරක්ෂක දෙපාර්තමේන්තුව පැවසුවත්, සිද්ධිය සම්බන්ධයෙන් තවමත් පරීක්ෂණ ක්රියාත්මකයි. හමුදා සාමාජිකයින්ගේ අනන්යතාවය තහවුරු කරන කාඩ්පත් සහ මුරපද පවා මෙම දත්ත ගබඩාවට සම්බන්ධ බැවින්, මෙය ඉතා සංවේදී තත්ත්වයක් බවයි වැඩිදුරටත් වාර්තා වෙන්නේ.

Discussion & Feedback