ප්‍රසිද්ධ අධ්‍යක්ෂක ගයි රිචී සහ ජනප්‍රිය නළු හෙන්රි කැවිල් එකතු වෙලා කරපු අලුත්ම නිර්මාණය වන ‘ද මිනිස්ට්‍රි ඔෆ් අන්ජෙන්ට්ල්මන්ලි වෝෆෙයාර්’ (The Ministry of Ungentlemanly Warfare) චිත්‍රපටය මේ දවස්වල නෙට්ෆ්ලික්ස් වේදිකාව තුළ විශාල ජනප්‍රියත්වයක් ලබාගෙන තියෙනවා. සැප්තැම්බර් 16 වෙනිදා නෙට්ෆ්ලික්ස් වෙත නිකුත් වුණු මේ R-rated යුද ක්‍රියාදාම චිත්‍රපටය ඉතාම කෙටි කාලයක් ඇතුළත ඇමරිකාවේ වැඩිම පිරිසක් නරඹන චිත්‍රපට අතර තුන්වෙනි ස්ථානයට පත් වෙන්න සමත් වුණා. මේ චිත්‍රපටය දැනටමත් ‘පුස් ඉන් බූට්ස්’ වගේ ජනප්‍රිය චිත්‍රපට පවා පසුකරමින් ඉදිරියට ඇවිත් තියෙනවා.
හෙන්රි කැවිල් කියන්නේ දැනටමත් නෙට්ෆ්ලික්ස් වේදිකාවේ ‘ද විචර්’ සහ ‘එනෝලා හෝම්ස්’ වගේ නිර්මාණ හරහා ලොකු රසික පිරිසක් දිනාගෙන ඉන්න නළුවෙක්. ඒ වගේම ගයි රිචීත් තමන්ගේ නිර්මාණ හරහා ප්‍රේක්ෂකයන්ව ආකර්ෂණය කරගන්න දක්ෂ කෙනෙක්. මේ දෙන්නාගේ එකතුවෙන් නිර්මාණය වුණු මේ චිත්‍රපටයේ ඇලන් රිච්සන් සහ එයිසා ගොන්සාලෙස් වගේ තවත් ජනප්‍රිය නළු නිළියන් රැසක් රඟපානවා. මේ චිත්‍රපටයේ සාර්ථකත්වයත් එක්කම ඔවුන් දෙදෙනාගේ තවත් නිර්මාණයක් වන ‘ඉන් ද ග්‍රේ’ (In The Grey) චිත්‍රපටයත් මේ වෙද්දී ප්‍රයිම් වීඩියෝ (Prime Video) හරහා ලොව පුරා වැඩිම පිරිසක් නරඹන චිත්‍රපට අතර හතරවෙනි ස්ථානයට පත් වෙලා තියෙනවා.
මේ විදිහට බලද්දී ගයි රිචී සහ හෙන්රි කැවිල් කියන්නේ මේ දවස්වල ස්ට්‍රීමින් වේදිකාවල අතිශය සාර්ථකම යුගලයක් බවට පත්වෙලා ඉවරයි. ඔයාලත් ක්‍රියාදාම චිත්‍රපටවලට කැමති කෙනෙක් නම්, අනිවාර්යයෙන්ම මේ චිත්‍රපටය නෙට්ෆ්ලික්ස් හරහා නරඹලා බලන්න පුළුවන්.
Discussion & Feedback