මේ දවස්වල අභ්‍යවකාශ ලෝකයේ ලොකු කතාබහක් ඇති වෙලා තියෙනවා. ඒ තමයි නැමීබියාවේ අහසේ දර්ශනය වුණු අමුතුම කොළ පැහැති වල්ගා තරුවක් ගැන. 220P/McNaught කියලා හඳුන්වන මේ වල්ගා තරුව, ඕස්ට්‍රේලියානු තාරකා විද්‍යාඥ රොබට් එච්. මැක්නෝට් විසින් තමයි මුලින්ම හොයාගෙන තියෙන්නේ. මේ වල්ගා තරුව අවුරුදු 5.5කට සැරයක් සූර්යයා වටා ගමන් කරනවා. පසුගිය ජූනි මාසයේදී සූර්යයාට ආසන්නම ස්ථානයට පැමිණි අවස්ථාවේදී, මේ වල්ගා තරුව සාමාන්‍ය ප්‍රමාණයට වඩා 8,000 ගුණයකින් දීප්තිමත් වෙලා තියෙනවා. මේ අගෝස්තු මාසයේදීත් එය සාමාන්‍ය ප්‍රමාණයට වඩා 600 ගුණයක දීප්තියකින් බැබළෙන අයුරු ජෙරල්ඩ් රේමන් සහ මයිකල් ජේගර් කියන ඡායාරූප ශිල්පීන් දෙදෙනාට ඉතා පැහැදිලිව ඡායාරූප ගත කරන්න පුළුවන් වෙලා තියෙනවා.
සාමාන්‍යයෙන් වල්ගා තරුවක් මෙතරම් පැහැදිලිව අහසේ දකින්න ලැබෙන්නේ හරිම කලාතුරකින්. බොහෝ වෙලාවට මේවා පියවි ඇසට පේන්නේ නැහැ, දුරේක්ෂයකින් බැලුවත් හඳුනාගන්න අමාරුයි. ඒ වගේම මේ දවස්වල පර්සීඩ්ස් උල්කාපාත වර්ෂාවත් අහසේ දකින්න ලැබෙන නිසා අභ්‍යවකාශය ගැන උනන්දුවක් දක්වන අයට මේක හරිම අපූරු කාලයක්. ස්විෆ්ට්-ටට්ල් වල්ගා තරුවේ සුන්බුන් නිසා ඇතිවෙන මේ උල්කාපාත වර්ෂාවත් එක්ක, අහසේ තරු කඩා වැටෙන දර්ශනයක් වගේ ලස්සන දසුන් 100ක් විතර එක රැයකට බලාගන්න පුළුවන්. අභ්‍යවකාශයේ මේ වගේ විශ්මිත දේවල් දකින්න ලැබෙන එක ඇත්තටම හරිම වාසනාවක් නේද?
Discussion & Feedback