රජයේ ආයතනවල සේවක කළමනාකරණය වඩාත් කාර්යක්ෂම සහ විනිවිදභාවයකින් යුතුව සිදු කිරීමේ අරමුණින් රාජ්ය පරිපාලන අමාත්යාංශය විසින් අලුත්ම ‘GovHR’ ඩිජිටල් පද්ධතිය පසුගියදා එළිදැක්වුවා. ශ්රී ලංකා සංවර්ධන පරිපාලන ආයතනයේදී (SLIDA) පැවැති මෙම උත්සවයේදී අමාත්ය මහාචාර්ය චන්දන අබේරත්න මහතා සඳහන් කළේ, මෙතෙක් කඩදාසි ගොනු හරහා සිදු කළ සංකීර්ණ රාජ්ය සේවක කටයුතු මේ හරහා ඉතා පහසුවෙන් සිදු කරගත හැකි බවයි. බඳවා ගැනීම්, උසස්වීම්, ස්ථාන මාරුවීම්, පුහුණු කටයුතු මෙන්ම විශ්රාම වැටුප් සම්බන්ධ සියලුම තොරතුරු මෙම පද්ධතිය තුළින් එකම තැනකින් කළමනාකරණය කරගන්න පුළුවන්.
දැනට ශ්රී ලංකාවේ රාජ්ය සේවකයන් ලක්ෂ 12කට ආසන්න පිරිසක් සේවයේ නියුතු වන අතර, මේ වසරේදී තවත් අලුතින් 120,000කට වැඩි පිරිසක් බඳවා ගැනීමට නියමිතයි. මෙතරම් විශාල පිරිසකගේ දත්ත පවත්වාගෙන යාමේදී මීට පෙර පැවති ලිපිගොනු ක්රමයේ තිබූ ප්රමාදයන් සහ අපහසුතා මෙම නව ක්රමවේදය හරහා සම්පූර්ණයෙන්ම මග හැරෙනු ඇති බවයි බලධාරීන් පවසන්නේ. මෙය රාජ්ය සේවයේ කාර්යක්ෂමතාව ඉහළ නැංවීමට සහ වගවීම තහවුරු කිරීමට ගත් ඉතා වැදගත් පියවරක් ලෙස දකින්න පුළුවන්. ඉදිරියේදී මෙම පද්ධතිය මගින් රාජ්ය සේවකයන්ගේ ගැටලු සහ කාර්යසාධන ඇගයීම් වැනි දේවල් වඩාත් විනිවිදභාවයකින් යුතුව සිදු කිරීමට හැකි වනු ඇති බවත් අමාත්යවරයා වැඩිදුරටත් අවධාරණය කළා.

Discussion & Feedback