බොදු බල සේනා සංවිධානයේ මහලේකම් පූජ්ය ගලගොඩඅත්තේ ඥානසාර හිමියන්ට මීට පෙර ලැබී තිබුණු ජනාධිපති සමාව ශ්රේෂ්ඨාධිකරණය විසින් අවලංගු කිරීමත් සමඟ උන්වහන්සේ අතුරුදන් වී ඇති බව වාර්තා වෙනවා. 2019 වසරේදී හිටපු ජනාධිපති මෛත්රීපාල සිරිසේන මහතා විසින් ලබා දුන් එම සමාව අත්තනෝමතික බවත්, එය මහජන විශ්වාසය සහ ස්වාභාවික යුක්තියේ මූලධර්ම උල්ලංඝනය කිරීමක් බවත් ශ්රේෂ්ඨාධිකරණ විනිසුරු මඩුල්ල තීන්දු කළා. උසාවියට අපහාස කිරීමේ චෝදනාවට වසර හයක සිරදඬුවමක් විඳිමින් සිටියදී උන්වහන්සේට මෙම සමාව හිමි වුණත්, දැන් නැවතත් එම දඬුවමේ ඉතිරි කොටස විඳීමට සිදුව තිබෙනවා.
මේ තීන්දුවත් සමඟ බන්ධනාගාර නිලධාරීන් රාජගිරිය, නාවල පිහිටි උන්වහන්සේගේ විහාරස්ථානයට ගොස් තිබුණේ උන්වහන්සේව නැවත බන්ධනාගාරගත කිරීම සඳහායි. නමුත් එහි සිටි භික්ෂූන් වහන්සේලා පවසා ඇත්තේ උන්වහන්සේ සිටින ස්ථානයක් පිළිබඳව තමන් නොදන්නා බවයි. වසර හයක සිරදඬුවමෙන් මාස නවයක් පමණක් ගෙවා තිබියදී සමාව ලැබූ ඥානසාර හිමියන්ට, මේ වන විට ඉතිරි දඬුවම් කාලය බන්ධනාගාරයේ ගත කිරීමට සිදුව තිබෙනවා. මේ වන විට උන්වහන්සේ සොයා බලධාරීන් පරීක්ෂණ ආරම්භ කර ඇති අතර, ඉදිරියේදී මේ සම්බන්ධයෙන් වැඩිදුර තොරතුරු දැනගන්නට ලැබෙනු ඇත.
Discussion & Feedback