වසර 75ක් පුරා ලොව පුරා රසිකයන්ගේ ආදරය දිනාගත් ප්‍රවීණ ගායිකා ග්ලැඩිස් නයිට්, තමන්ගේ කාර්යබහුල සංගීත දිවියෙන් ටික කලකට විවේකයක් ගැනීමට තීරණය කර තිබෙනවා. මේ වන විට 82 වැනි වියේ පසුවන ඇය සිය ඉන්ස්ටග්‍රෑම් ගිණුම හරහා පණිවිඩයක් නිකුත් කරමින් සඳහන් කළේ, තමන්ගේ ජීවිතයේ මීළඟ අදියර වෙනුවෙන් පවුලේ අය සමඟ කාලය ගත කිරීමටත්, සෞඛ්‍ය තත්ත්වය කෙරෙහි වැඩි අවධානයක් යොමු කිරීමටත් තීරණය කළ බවයි. පසුගිය කාලයේ පැවති ඇගේ ප්‍රසංගවලදී ඇය වේදිකාව මත අපහසුවෙන් හැසිරෙන අයුරු සහ ගීත ගායනා කිරීමේදී අපහසුතාවයට පත්වන අයුරු දැක්වෙන වීඩියෝ දර්ශන සමාජ මාධ්‍ය ඔස්සේ සංසරණය වීමත් සමඟ රසිකයන් ඇය ගැන දැඩි කනස්සල්ලට පත්ව සිටියා.
ඇගේ පුත්‍රයා මීට පෙර ඇගේ සෞඛ්‍ය තත්ත්වය ගැන ප්‍රසිද්ධියේ අදහස් දැක්වුවත්, ග්ලැඩිස් නයිට් එය තරයේ ප්‍රතික්ෂේප කර තිබුණා. කෙසේ වෙතත්, මේ වන විට ඇය සිය රසිකයන්ට ස්තූතිය පුද කරමින් පවසන්නේ, පසුගිය දශක හතක කාලය පුරා තමන්ට ලබාදුන් සහයෝගය අතිමහත් බවයි. බස්ටා රයිම්ස් සහ කෙලී රෝලන්ඩ් වැනි ලොව ප්‍රසිද්ධ කලාකරුවන් රැසක් ඇගේ මෙම තීරණයට ගෞරවය පළ කරමින් සමාජ මාධ්‍ය ඔස්සේ සුබ පැතුම් එක් කර තිබෙනවා. ‘මිඩ්නයිට් ට්‍රේන් ටු ජෝර්ජියා’ වැනි අමරණීය ගීත රැසක් ලොවට දායාද කළ මේ මහා ගායිකාව, ඉදිරියේදී සිය පවුලේ අය සමඟ සතුටින් කාලය ගත කිරීමට බලාපොරොත්තු වන බවයි වැඩිදුරටත් සඳහන් වන්නේ.
Discussion & Feedback