බටහිර අප්රිකානු රටක් වන ගානාවේ ජාතික විදුලිබල පද්ධතියේ ඇති වූ බරපතල දෝෂයක් හේතුවෙන් මුළු රටම පාහේ අඳුරේ ගිලී තිබෙනවා. අගනුවර වන අක්රා, කුමාසි වැනි ප්රධාන නගර ඇතුළු ප්රදේශ රැසක විදුලිය සම්පූර්ණයෙන්ම ඇණහිට ඇති අතර, බදාදා අලුයම සිටම විදුලි බලාගාර කිහිපයක්ම අක්රිය වීම මෙම තත්ත්වයට හේතු වී තිබෙනවා. ගානා විදුලිබල සමාගම පවසන්නේ තම ඉංජිනේරුවන් විදුලිය යථා තත්ත්වයට පත් කිරීමට දැඩි උත්සාහයක නිරත වන බවයි. නමුත් සාමාන්ය විදුලි සැපයුම නැවත ලබා දෙන්නේ කවදාද යන්න පිළිබඳව මෙතෙක් නිශ්චිත ප්රකාශයක් සිදු කර නැහැ.
මෙම හදිසි විදුලි බිඳවැටීම නිසා ජනතාවගේ එදිනෙදා ජීවිතයට විශාල බලපෑමක් එල්ල වී තිබෙනවා. විශේෂයෙන්ම ජංගම දුරකථන ආරෝපණය කර ගැනීමට නොහැකි වීම නිසා ප්රවාහන සේවා ලබා ගැනීමට සහ ඩිජිටල් ගෙවීම් සිදු කිරීමට ජනතාව දැඩි අපහසුතාවයකට පත්ව සිටිනවා. කුඩා ව්යාපාරිකයන්ටත් මෙම තත්ත්වය නිසා විශාල පාඩුවක් සිදුව ඇති බවයි වාර්තා වන්නේ. ගානාව වසර ගණනාවක් තිස්සේ ‘දුම්සෝර්’ ලෙස හඳුන්වන නිතර විදුලිය විසන්ධි වීමේ ගැටලුවට මුහුණ දී සිටියත්, මෑත කාලයේදී එය යම්තාක් දුරකට පාලනය වී තිබුණා. කෙසේ වෙතත්, පැරණි ජල විදුලි බලාගාර සහ සම්ප්රේෂණ පද්ධතිවල පවතින දුර්වලතා හේතුවෙන් මෙවැනි බිඳවැටීම් තවමත් රටට විශාල අභියෝගයක් වී තිබෙනවා.

Discussion & Feedback