ජර්මනියේ ලයිප්සිග් ගුවන්තොටුපළට පසුගියදා එල්ල වූ ඩ්රෝන ප්රහාරය පිටුපස රුසියාවේ සම්බන්ධයක් ඇති බව ජර්මන් බලධාරීන් නිල වශයෙන් තහවුරු කර තිබෙනවා. පසුගිය අගෝස්තු මාසයේදී මෙම ගුවන්තොටුපළේ තිබී පුපුරණ ද්රව්ය සහිත ඩ්රෝන යානයක් සොයාගත් අතර, එය අසල තිබූ යුක්රේන භාණ්ඩ ප්රවාහන ගුවන් යානා ඉලක්ක කර ගත් එකක් බවයි විමර්ශනවලදී හෙළිවී ඇත්තේ. මෙම ප්රහාරය රුසියාව විසින් යුරෝපය තුළ ක්රියාත්මක කරන දෙමුහුන් යුද උපාය මාර්ගවල කොටසක් බව ජර්මන් අභ්යන්තර කටයුතු අමාත්යවරයා පවසනවා.
මෙම සිදුවීමට ප්රතිචාර වශයෙන් ජර්මනිය දැඩි පියවර ගැනීමට තීරණය කර තිබෙනවා. ඒ අනුව, බෝන් නුවර පිහිටි රුසියානු කොන්සල් කාර්යාලය වසා දැමීමටත්, බර්ලින් නුවර රුසියානු මධ්යස්ථානයේ ගිවිසුම් අවලංගු කිරීමටත් ජර්මන් විදේශ අමාත්යවරයා පියවර ගෙන තිබෙනවා. මීට අමතරව, රුසියානු පුරවැසියන් සඳහා වීසා නිකුත් කිරීමේදී දැඩි පාලනයන් ක්රියාත්මක කිරීමටත්, රුසියාවේ සෙවනැලි නෞකා සමූහයට එරෙහිව පීඩනය වැඩි කිරීමටත් ජර්මනිය සැරසෙනවා. මෙම තීරණයට ප්රතිචාර දක්වමින් රුසියාව පවසන්නේ බර්ලිනය ත්රස්තවාදයට අනුග්රහය දක්වන බවත්, තමන් ද මීට සමාන ප්රතිචාරයක් ලබා දෙන බවත්ය.
නේටෝ සංවිධානය සහ යුරෝපා සංගමය මෙම සිදුවීම සම්බන්ධයෙන් ජර්මනියට පූර්ණ සහයෝගය පළ කර ඇති අතර, රුසියාවේ මෙම ක්රියාකලාපය කලාපීය ආරක්ෂාවට තර්ජනයක් බවයි ඔවුන් පෙන්වා දෙන්නේ. ජර්මනිය දැනටමත් රුසියාවට එරෙහිව තවත් නව සම්බාධක පැනවීමට සූදානම් වන අතර, තම රටේ ආරක්ෂාව වෙනුවෙන් බුද්ධි අංශවල බලතල වැඩි කිරීමට ද රජය තීරණය කර තිබෙනවා.

Discussion & Feedback