ලෝක සිනමාවේ දැවැන්තයන් වන ජෝර්ජ් ලූකස්, ජෝඩි ෆොස්ටර්, සිගෝර්නි වීවර්, ක්‍රිස් මෙලෙඩැන්ඩ්‍රි සහ ප්‍රංශ සිනමාකරු ක්ලෝඩ් ලෙලූෂ් යන පිරිසට ප්‍රංශයේ ඉහළම ගෞරව සම්මානය වන ‘ලීජන් ඔෆ් ඔනර්’ (Legion of Honor) සම්මානය හිමිවෙලා තියෙනවා. පැරිස් නුවර පිහිටි එලිසී මාලිගයේදී ප්‍රංශ ජනාධිපති එම්මානුවෙල් මැක්‍රොන් මහතා අතින් මෙම සම්මාන පිරිනැමීම සිදු වුණා. ජෝර්ජ් ලූකස්, ජෝඩි ෆොස්ටර්, සිගෝර්නි වීවර් සහ ක්‍රිස් මෙලෙඩැන්ඩ්‍රි හට ‘ෂෙවලියර් ද ලා ලීජන් ඔෆ් ඔනර්’ යන නයිට් පදවියට සමාන ගෞරව නාමය පිරිනැමූ අතර, ක්ලෝඩ් ලෙලූෂ් හට ‘කොමාන්ඩර්’ යන ගෞරව නාමය පිරිනැමීම විශේෂත්වයක්.
මෙම අවස්ථාවේදී ජනාධිපති මැක්‍රොන් විසින් ක්‍රිස් මෙලෙඩැන්ඩ්‍රිගේ සිනමා නිර්මාණ සහ ඔහු ප්‍රංශ සිනමාව සමඟ ගොඩනඟා ඇති සබඳතාව අගය කළා. විශේෂයෙන්ම ‘මිනියන්ස්’ වැනි චරිත හරහා ලෝකයේම ආකර්ෂණය දිනා ගැනීමට ඔහු සමත් වූ බව ජනාධිපතිවරයා සිහිපත් කළා. 1802 වසරේදී නැපෝලියන් බොනපාට් විසින් ආරම්භ කරන ලද මෙම සම්මානය, ප්‍රංශයේ පිරිනැමෙන ඉහළම රාජ්‍ය ගෞරවය ලෙස සැලකෙනවා. පොදු යහපත උදෙසා කැපවී කටයුතු කරන පුද්ගලයන් ඇගයීම සඳහා මෙම සම්මානය ලබා දෙන අතර, මෙවර සම්මාන ලාභීන් තමන්ගේ නිර්මාණ හරහා ලෝක සිනමාවට කළ සේවය මෙයින් මනාව පැහැදිලි වෙනවා.
Discussion & Feedback