අභ්‍යවකාශ විද්‍යාවේ සුවිශේෂී සන්ධිස්ථානයක් සනිටුහන් කරමින්, විද්‍යාඥයන් පිරිසක් පළමු වතාවට මන්දාකිණි පොකුරක චුම්භක ක්ෂේත්‍රය එහි මධ්‍යයේ සිට පිටත මායිම් දක්වාම සිතියම්ගත කිරීමට සමත් වෙලා තියෙනවා. පෘථිවියේ සිට ආලෝක වර්ෂ බිලියනයක් පමණ ඈතින් පිහිටි ‘Abell 2255’ නම් මෙම දැවැන්ත මන්දාකිණි පොකුර අධ්‍යයනය කිරීම සඳහා යුරෝපීය LOFAR ගුවන් විදුලි දුරේක්ෂය පැය 224ක කාලයක් පුරා ඉතා ගැඹුරු නිරීක්ෂණ සිදු කර තිබෙනවා. මෙමගින් විශ්වයේ විශාලතම ව්‍යුහයන් නිර්මාණය වන ආකාරය සහ ඒවායේ චුම්භක ක්ෂේත්‍ර විකාශනය වන සැටි පිළිබඳව අලුත් දැනුමක් ලබා ගැනීමට විද්‍යාඥයන්ට හැකි වී තියෙනවා.
මෙම පර්යේෂණයට නායකත්වය දුන් ඉතාලි ජාතික තාරකා භෞතික විද්‍යා ආයතනයේ ඇන්ඩ්‍රියා බොටියොන් පවසන පරිදි, මෙම චුම්භක ක්ෂේත්‍ර අහඹු ලෙස විසිරී පවතින ඒවා නෙවෙයි. ඒ වෙනුවට, මන්දාකිණි පොකුරක් නිර්මාණය වීමේදී සිදුවන වායු චලනයන් මගින් මෙම ක්ෂේත්‍ර ක්‍රමවත්ව හැඩගැසෙන බව ඔවුන් සොයාගෙන තියෙනවා. සමහර ප්‍රදේශවල චුම්භක ක්ෂේත්‍ර රේඛා දිගු වී පවතින අතර, කම්පන තරංග පවතින ප්‍රදේශවල ඒවා වෙනස් ආකාරයකට දිශානත වී තිබෙනවා. මේ අනුව, මන්දාකිණි පොකුරු වර්ධනය වීමට බලපාන එම යාන්ත්‍රණයන්ම ඒවායේ චුම්භක ක්ෂේත්‍ර හැඩගැස්වීමටත් දායක වන බවට මෙය ප්‍රබල සාක්ෂියක් වෙනවා. මෙම වැදගත් පර්යේෂණ වාර්තාව ඉදිරියේදී ‘Astronomy & Astrophysics’ සඟරාවේ පළ වීමට නියමිතයි.
Discussion & Feedback