ඝානාවේ ජාතික හැඳුනුම්පත හෙවත් ‘ඝානා කාඩ්’ පත භාවිතයේදී සිදුවන වංචා සහ අක්රමිකතා අවම කිරීම සඳහා එරට බලධාරීන් විසින් දැඩි තීරණ කිහිපයක් ගෙන තිබෙනවා. මින් ඉදිරියට ඕනෑම ආයතනයකදී හෝ ව්යාපාරික ස්ථානයකදී හැඳුනුම්පත පරීක්ෂා කිරීමේදී එහි පිටපතක් ලබා ගැනීම හෝ දෑසින් බලා තහවුරු කිරීම සම්පූර්ණයෙන්ම තහනම් කර ඇති අතර, ඒ වෙනුවට ජංගම දුරකථන යෙදුමක් හරහා ජෛවමිතික (biometric) තාක්ෂණය භාවිතයෙන් එය පරීක්ෂා කිරීම අනිවාර්ය කර තිබෙනවා.
මෙම හැඳුනුම්පතේ පුද්ගලයෙකුගේ ඇඟිලි සලකුණු, ඇසේ කණිනිකා ස්කෑන් දත්ත, ඡායාරූපය සහ අත්සන වැනි වැදගත් දත්ත ඇතුළත් කර තිබෙනවා. මීට පෙර බොහෝ ආයතන හැඳුනුම්පතේ පිටපත් පමණක් ලබා ගැනීම නිසා වංචනිකයින්ට අන් අයගේ අනන්යතාවන් හොරකම් කිරීම පහසු වී තිබුණා. නමුත් දැන් හඳුන්වා දී ඇති නව නීතියට අනුව, ජෛවමිතික පරීක්ෂාවකින් තොරව ගනුදෙනු සිදු කරන ආයතනවලට සහ පුද්ගලයින්ට දඩ මුදල් ගෙවීමට හෝ නීතිමය ක්රියාමාර්ගවලට මුහුණ දීමට සිදුවනු ඇති බව ජාතික හැඳුනුම්පත් අධිකාරිය පවසනවා.
බැංකු සේවා ලබා ගැනීමට, සිම් කාඩ්පත් ලියාපදිංචි කිරීමට සහ රියදුරු බලපත්ර ලබා ගැනීමට පවා මෙම හැඳුනුම්පත අත්යවශ්ය වන නිසා, මෙම නව ඩිජිටල් ක්රමවේදය මගින් රටේ ආරක්ෂාව තවදුරටත් තහවුරු වනු ඇතැයි බලධාරීන් විශ්වාස කරනවා. තවමත් මෙම තාක්ෂණයට සම්බන්ධ වී නොමැති ආයතනවලට කඩිනමින් ඒ සඳහා ලියාපදිංචි වන ලෙසත්, ඉදිරි දින කිහිපය තුළ මේ පිළිබඳව ජනතාව දැනුවත් කරන බවත් බලධාරීන් වැඩිදුරටත් සඳහන් කරනවා.

Discussion & Feedback