මියන්මාරයේ සගයිං කලාපයේ පිහිටි විහාරස්ථානයකට එල්ල වුණු දරුණු ගුවන් ප්රහාරයකින් අහිංසක සිවිල් වැසියන් 14 දෙනෙක් ජීවිතක්ෂයට පත්වෙලා තියෙනවා. මේ ප්රහාරය සිද්ධ වෙලා තියෙන්නේ පසුගිය සිකුරාදා උදෑසන කාලයේදීයි. බෞද්ධ වස්සාන කාලය නිමිත්තෙන් පැවැත්වුණු භාවනා වැඩසටහනකට සහභාගි වෙන්න තමයි මේ වැඩිහිටියන් පිරිස විහාරස්ථානයට ඇවිත් ඉඳලා තියෙන්නේ. මියගිය අය අතර අවුරුදු 50ත් 70ත් අතර වයසේ පසුවන පිරිමි පුද්ගලයින් 11 දෙනෙක් සහ කාන්තාවන් 3 දෙනෙක් ඉන්නවා කියලා තමයි වාර්තා වෙන්නේ. ඒ වගේම මේ ප්රහාරයෙන් භික්ෂූන් වහන්සේලා කිහිප නමකටත් තුවාල සිද්ධ වෙලා තියෙනවා.
ප්රහාරය එල්ල වුණු අවස්ථාවේදී ප්රදේශවාසීන් සහ සහන සේවකයින් තුවාල ලැබූවන් බේරාගන්න උත්සාහ කරද්දී, නැවතත් එම ස්ථානයට ගුවන් යානයකින් බෝම්බ හෙළා තිබෙනවා. මේ සිදුවීමෙන් ප්රදේශයේ ජනතාව දැඩි බියකට පත්වෙලා ඉන්නවා. 2021 වසරේදී මියන්මාරයේ හමුදා කුමන්ත්රණයකින් පස්සේ එරට පවතින්නේ ඉතාම අස්ථාවර තත්ත්වයක්. හමුදාව නිතරම සිවිල් ඉලක්ක වෙත ප්රහාර එල්ල කරන බවට චෝදනා එල්ල වුණත්, ඔවුන් පවසන්නේ තමන් ඉලක්ක කරන්නේ නීත්යානුකූල ඉලක්ක පමණක් බවයි. කෙසේ වෙතත්, මෙවැනි පූජනීය ස්ථානයකට එල්ල වුණු ප්රහාරය ලෝකය පුරාම දැඩි කතාබහකට ලක්වෙලා තියෙනවා.

Discussion & Feedback