මෙවර පින්යාඕ ජාත්‍යන්තර චිත්‍රපට උළෙලේදී චීන සිනමා අධ්‍යක්ෂ නිව් නිව්ගේ ‘ෆයිනල් පේමන්ට්’ (Final Payment) චිත්‍රපටය හොඳම චිත්‍රපටයට හිමි ‘ෆෙයි මු’ සම්මානයෙන් පිදුම් ලැබුවා. නිවසක් ප්‍රතිසංස්කරණය කිරීමේදී හිමිකරු සහ කොන්ත්‍රාත්කරු අතර ඇතිවන ගැටුමක් වටා ගෙතී ඇති මෙම චිත්‍රපටය, එහි සරල බව සහ ගැඹුරු චිත්තවේගීය පසුබිම නිසා විනිසුරුවන්ගේ දැඩි ඇගයීමට ලක්වුණා. මෙහි ප්‍රධාන චරිතය නිරූපණය කළ නිව් ජියැන්රොන්ග් හොඳම නළුවා ලෙසද සම්මාන දිනාගැනීම විශේෂත්වයක්.
එමෙන්ම ජාත්‍යන්තර අංශයේ හොඳම චිත්‍රපටයට හිමි ‘රොබර්ටෝ රොසෙලිනි’ සම්මානය හිමිවුණේ රෆිකි ෆාරියාලාගේ ‘කොංගෝ බෝයි’ (Congo Boy) චිත්‍රපටයටයි. අභියෝගාත්මක කාලවකවානුවක පවුලේ වගකීම් කරට ගනිමින් ශුභවාදීව ලෝකය දෙස බලන තරුණයෙකුගේ සත්‍ය කතාවක් පාදක කරගත් මෙම නිර්මාණය, නව යථාර්ථවාදී සිනමා සම්ප්‍රදාය සිහිගන්වන බව විනිසුරු මණ්ඩලය පවසනවා. මෙම සම්මාන උළෙලේදී නැගී එන අධ්‍යක්ෂවරුන්ගේ නිර්මාණ රැසක් ඇගයීමට ලක්වූ අතර, හොංකොං සිනමාකරු ඈන් හුයි ඇතුළු ප්‍රවීණයන් කිහිප දෙනෙකුටද විශේෂ ගෞරව සම්මාන පිරිනැමුවා.
සැප්තැම්බර් 24 වැනිදා ආරම්භ වූ මෙම සිනමා උළෙල, ලොව පුරා සිනමා ලෝලීන්ගේ අවධානය දිනාගනිමින් සාර්ථකව නිමාවට පත්වුණා. චීන සිනමාවට ජාත්‍යන්තර දායකත්වයක් ලබාදුන් මාර්කෝ මුලර් සහ හන් සැන්පිං වැනි ප්‍රවීණයන් ද මෙහිදී විශේෂ ඇගයීමට ලක්වීම සිනමා ක්ෂේත්‍රයේ වැදගත් සිදුවීමක් වුණා.
Discussion & Feedback