ජපානයේ උසම කන්ද වන ෆුජි කන්ද තරණය කරමින් සිටි පියෙක් තමන්ගේ හත් හැවිරිදි පුතාව කන්ද මැද තනි කර දමා ගිය පුවතක් මේ දිනවල ලෝකයේම අවධානයට ලක්වෙලා තියෙනවා. මේ පියා තමන්ගේ පුතාට මහන්සියි කියලා කියපු නිසා, ඔහුව කඳු මුදුනේ තිබෙන බංකුවක වාඩි කරවලා ‘මම එනකම් මෙතන ඉන්න’ කියලා පවසා තවත් පුතෙක් එක්ක කන්ද නගින්න ගිහින් තියෙනවා. ඒ වෙලාවේ දරුවා ළඟ තිබිලා තියෙන්නේ බීම බෝතලයක් සහ කෙටි ආහාරයක් විතරයි. වැසි සහිත සහ මීදුම පිරි කාලගුණයක් තිබුණු මීටර් දෙදහසකට වඩා උස ප්රදේශයක මේ කුඩා දරුවා තනිවෙලා හිටියේ.
පසුව කඳු මුදුනේ තිබුණු නවාතැනක සේවකයින්ට මේ දරුවාව හමුවෙලා ඔවුන් වහාම පොලිසියට දැනුම් දීලා තියෙනවා. පියා කන්දේ තවත් ඉහළ ස්ථානයක සිටියදී පොලිසිය විසින් සොයාගෙන දරුවා සමඟ නැවත මුණගස්වා තිබෙනවා. දරුවා සිටි ස්ථානයේ සිට පියා සිටි ස්ථානයට යාමට පැය තුනක පමණ කාලයක් ගතවෙනවා. මේ සිද්ධිය සම්බන්ධයෙන් පොලිසිය පියාට දැඩි ලෙස අවවාද කරලා තියෙනවා. ‘කන්ද නගින එක නවත්වන්න වුණත් කමක් නැහැ, හැබැයි දරුවෙක් මෙහෙම තනි කරලා යන එක කොහෙත්ම අනුමත කරන්න බැහැ’ කියලා ඔවුන් පවසා තිබෙනවා. පියාත් තමන් අතින් වුණු මේ වරද ගැන පසුව සමාව ඉල්ලා තිබෙනවා.
ෆුජි කන්ද කියන්නේ ලෝක උරුමයක් වගේම බොහෝ දෙනෙක් නගින්න කැමති තැනක්. නමුත් මෙවැනි වගකීම් විරහිත ක්රියාවන් නිසා දරුවන්ගේ ජීවිත අනතුරේ වැටෙන්න පුළුවන් බවයි බලධාරීන් පෙන්වා දෙන්නේ. වාර්ෂිකව ලක්ෂ දෙකකට අධික පිරිසක් මේ කන්ද තරණය කරන නිසා ආරක්ෂාව ගැන වැඩිපුර සැලකිලිමත් වෙන්න කියලා හැමෝටම මතක් කරනවා.

Discussion & Feedback