ඉතියෝපියාවේ ටිග්රේ කලාපයේ කාන්තාවන් සහ කන්යා මරිය තුමිය වෙනුවෙන් වාර්ෂිකව පැවැත්වෙන ‘අෂෙන්ඩා’ නම් ප්රධාන සංස්කෘතික උත්සවය මෙවර අවලංගු කිරීමට බලධාරීන් තීරණය කර තිබෙනවා. සාමාන්යයෙන් දහස් ගණනක් තරුණියන් සහ කාන්තාවන් විවිධ වර්ණවත් ඇඳුමින් සැරසී සහභාගී වන මෙම උත්සවය මෙවර පැවැත්වීමට නියමිතව තිබුණේ මෙකෙල් නගරයේ ක්රීඩාංගණයකයි. කෙසේ වෙතත්, ප්රදේශයේ පවතින ඩ්රෝන ප්රහාරවල තර්ජනය සහ යුද්ධයක් ඇතිවීමේ බිය හේතුවෙන් මෙම තීරණය ගැනීමට සිදුවූ බව ටිග්රේ සංස්කෘතික හා සංචාරක කාර්යාංශය පවසනවා.
පසුගිය දිනවල මෙකෙල් නගරයට සහ අවට ප්රදේශවලට එල්ල වූ ඩ්රෝන ප්රහාර නිසා සාමාන්ය වැසියන් කිහිප දෙනෙකු ජීවිතක්ෂයට පත්වීම සහ තවත් පිරිසක් තුවාල ලැබීම මෙම තීරණයට ප්රධාන හේතුවක් වී තිබෙනවා. වසර දෙකක දරුණු සිවිල් යුද්ධයකින් පසු 2022 වසරේදී සාම ගිවිසුමක් අත්සන් කළද, මේ වන විට දෙපාර්ශවය අතර පවතින දේශපාලන අර්බුද නිසා යළිත් ගැටුම් ඇතිවීමේ බියක් ජනතාව අතර මතුව තිබෙනවා. අහිංසක ජනතාව ඉලක්ක කර එල්ල කරන මෙම ප්රහාර හෙළා දකින බව පවසන ප්රාදේශීය බලධාරීන්, තවදුරටත් ගැටුම් උත්සන්න වීම වැළැක්වීමට ජාත්යන්තර ප්රජාවගේ මැදිහත්වීම ඉල්ලා සිටිනවා.
‘අෂෙන්ඩා’ යනු ටිග්රේ ප්රදේශයේ තරුණියන් ඉතා උනන්දුවෙන් බලා සිටින උත්සවයක්. ඔවුන් මෙම කාලයේදී විශේෂිත ලෙස කොණ්ඩය සකසාගෙන, අලුත් ඇඳුම් ඇඳගෙන වීදිවල නටමින් ගයමින් සතුටු වෙනවා. නමුත් මෙවර උත්සවය අවලංගු කිරීම නිසා එම තරුණියන් විශාල කලකිරීමකට පත්ව සිටින අතර, රටේ සාමය යළි ස්ථාපිත වේවායි ඔවුන් ප්රාර්ථනා කරනවා.

Discussion & Feedback