ඇමරිකානු ජනාධිපති ඩොනල්ඩ් ට්‍රම්ප්ගේ නව එයාර් ෆෝස් වන් ගුවන් යානයේ ආරක්ෂක අඩුපාඩු පිළිබඳව වාර්තා කළ නිව්යෝර්ක් ටයිම්ස් පුවත්පතේ මාධ්‍යවේදීන් පිරිසකට ඇමරිකානු අධිකරණ දෙපාර්තමේන්තුවෙන් අධිකරණ නියෝග ලැබී තිබෙනවා. ජූලියන් ඊ. බාන්ස්, එරික් ලිප්ටන්, ටයිලර් පේජර් සහ එරික් ෂ්මිට් යන මාධ්‍යවේදීන්ට මෙලෙස කැඳවීම් ලැබී ඇත්තේ, කටාර් රජයෙන් පරිත්‍යාග කළ නව බෝයිං 747-8 යානයේ මිසයිල නාශක තාක්ෂණය වැනි ආරක්ෂක අංග නොමැති බවට ඔවුන් සිදුකළ හෙළිදරව්ව සම්බන්ධයෙන්. මෙම පුවත ජාතික ආරක්ෂාවට තර්ජනයක් බව පවසමින් එය ප්‍රකාශයට පත් නොකරන ලෙස එෆ්.බී.අයි ආයතනය මීට පෙර ඉල්ලා තිබුණත්, මාධ්‍යවේදීන් තම වගකීම ඉටු කරමින් එය වාර්තා කර තිබුණා.
මෙම සිදුවීම මාධ්‍ය නිදහසට එල්ල කළ බරපතල තර්ජනයක් බව නිව්යෝර්ක් ටයිම්ස් ආයතනය පවසනවා. ඔවුන්ගේ නීති අංශ ප්‍රධානී ඩේවිඩ් මැක්ග්‍රෝ පවසන්නේ, රජයේ ක්‍රියාකාරකම් සහ මහජන බදු මුදල් වියදම් වන ආකාරය ජනතාවට දැනගැනීමට අයිතියක් ඇති බවත්, මාධ්‍යවේදීන් බිය ගැන්වීම හරහා සත්‍ය වසන් කිරීමට රජය උත්සාහ කරන බවත්ය. ට්‍රම්ප්ගේ දෙවන ධුර කාලය තුළ මාධ්‍ය ආයතන ඉලක්ක කර ගනිමින් මෙවැනි දැඩි ක්‍රියාමාර්ග ගැනීම නිතරම දකින්න ලැබෙන අතර, මීට පෙර වොෂින්ටන් පෝස්ට් මාධ්‍යවේදිනියකගේ නිවස පවා ෆෙඩරල් නියෝජිතයන් විසින් සෝදිසි කර තිබුණා. මේ වන විට මාධ්‍ය ආයතන සහ රජය අතර පවතින මෙම ගැටුම ඇමරිකානු ප්‍රජාතන්ත්‍රවාදයේ අනාගතය පිළිබඳව බරපතල ප්‍රශ්න මතු කරමින් තිබෙනවා.
Discussion & Feedback