ලෝකයම කතා වුණු ඕ.ජේ. සිම්ප්සන්ගේ මිනීමැරුම් නඩුව ගැන අලුත්ම හෙළිදරව්වක් කරන්න පීකොක් (Peacock) ආයතනය සූදානම් වෙනවා. 1994 වසරේ සිදුවුණු නිකොල් බ්‍රවුන් සිම්ප්සන් සහ රොන් ගෝල්ඩ්මන්ගේ ඝාතන සිද්ධිය සම්බන්ධයෙන් ඕ.ජේ. සිම්ප්සන් තනිවම නෙවෙයි ක්‍රියා කළේ කියන සැකය මේ වාර්තා චිත්‍රපටයෙන් මතු කරනවා. ‘OJ’s Accomplice’ නමින් එන මේ දෙපියවර වාර්තා චිත්‍රපටය දෙසැම්බර් මාසයේදී විකාශය වෙන්න නියමිතයි. සිම්ප්සන්ගේ සමීපතමයන් මේ සිදුවීම ගැන බොහෝ දේවල් දැනගෙන හිටියත්, ඒ ගැන මෙතෙක් හෙළි නොකළ බවටයි මේ චිත්‍රපටය තර්ක කරන්නේ.
මේ වාර්තා චිත්‍රපටය සඳහා කේටෝ කේලින් සහ නිකොල් බ්‍රවුන්ගේ සහෝදරිය ඇතුළු පිරිසක් සම්මුඛ සාකච්ඡා ලබා දීලා තියෙනවා. මීට අමතරව, මෙතෙක් කිසිවෙකුත් අසා නැති ඇසින් දුටු සාක්ෂි සහ නව තොරතුරු රැසක් මෙහි අන්තර්ගතයි. සිම්ප්සන් තනිවම මේ අපරාධය කළා කියන මතය අභියෝගයට ලක් කරමින්, ඔහුගේ සමීපතම කවයේ අයත් එදා රාත්‍රියේ එහි සිටියාද කියන ප්‍රශ්නය මෙයින් මතු කරනවා. අතීතයේ ලොකුම ආන්දෝලනයක් ඇති කළ මේ අපරාධ කතාව ගැන අපිට තිබුණු අවබෝධය සම්පූර්ණයෙන්ම වෙනස් කරන්න මේ වාර්තා චිත්‍රපටයට පුළුවන් වේවි කියලා තමයි නිර්මාණකරුවන් පවසන්නේ.
Discussion & Feedback