ජනප්‍රිය ‘සේව්ඩ් බයි ද බෙල්’ (Saved by the Bell) ටෙලි කතා මාලාවේ විදුහල්පති රිචඩ් බෙල්ඩිං හෙවත් මිස්ටර් බෙල්ඩිං ලෙස ලොව පුරා රසිකයන් අතර නොමැකෙන මතකයක් ඉතිරි කළ ප්‍රවීණ රංගන ශිල්පී ඩෙනිස් හැස්කින්ස් වයස අවුරුදු 75ක්ව තිබියදී අභාවප්‍රාප්ත වී තිබෙනවා. ඔහුගේ අභාවය පිළිබඳ පුවත ඔහුගේ කළමනාකරු වන ජේ ෂැක්ටර් විසින් තහවුරු කර ඇති අතර, එය සිනමා ලෝලීන්ට මෙන්ම ඔහුගේ රසිකයන්ටත් දැඩි කම්පනයක් ගෙන දෙන පුවතක් බවයි වාර්තා වෙන්නේ. ඩෙනිස්ගේ මරණයට නිශ්චිත හේතුවක් මෙතෙක් අනාවරණය වී නැහැ.
ඩෙනිස් හැස්කින්ස් ගැන අදහස් දක්වමින් ඔහුගේ කළමනාකරු පවසා සිටියේ, ඔහු ඉතාමත් කරුණාවන්ත සහ රසිකයන්ට බෙහෙවින් ආදරය කළ පුද්ගලයෙක් බවයි. වසර 20කට අධික කාලයක් තිස්සේ තමන්ගේ මිතුරෙකු සහ සේවාදායකයෙකු ලෙස ඔහු සමඟ කටයුතු කළ බවත්, ඔහුගේ වියෝව තමන්ට දරාගත නොහැකි පාඩුවක් බවත් ඔහු සඳහන් කර තිබෙනවා. 1989 වසරේ ‘ගුඩ් මෝනිං මිස් බ්ලිස්’ කතා මාලාවෙන් රංගන ක්ෂේත්‍රයට පිවිසි ඩෙනිස්, ඉන්පසුව ‘සේව්ඩ් බයි ද බෙල්’ කතා මාලාව හරහා ලොව පුරා ඉමහත් ජනප්‍රියත්වයක් ලබා ගත්තා.
ඔහු සිය රංගන දිවිය තුළ ‘ද වෙස්ට් විං’, ‘මැඩ් මෙන්’, ‘හව් අයි මෙට් යුවර් මදර්’ සහ ‘නිව් ගර්ල්’ වැනි අතිශය ජනප්‍රිය ටෙලි කතා මාලා රැසකටම සිය රංගන දායකත්වය ලබා දී තිබෙනවා. තිරය මත ඔහු මවාපෑ මිස්ටර් බෙල්ඩිංගේ චරිතය අදටත් බොහෝ දෙනාගේ ආදරය දිනාගෙන සිටින අතර, ඔහුගේ වියෝවෙන් කම්පාවට පත් ලොව පුරා සිටින රසිකයන් සමාජ මාධ්‍ය ඔස්සේ ඔහුට අවසන් ගෞරවය පුද කරමින් සිටිනවා.
Discussion & Feedback