මේ දවස්වල රටේ පවතින තත්ත්වයත් එක්ක ඩෙංගු රෝගීන්ගේ වර්ධනයක් දකින්න ලැබෙනවා. ජාතික ඩෙංගු මර්දන ඒකකය නිකුත් කරපු අලුත්ම දත්තවලට අනුව මේ වසරේ මේ දක්වා කාලය තුළ වාර්තා වෙලා තියෙන මුළු ඩෙංගු රෝගීන් සංඛ්යාව 68,071ක් දක්වා ඉහළ ගිහින් තියෙනවා. මේ අවාසනාවන්ත තත්ත්වය නිසා මේ වන විට පුද්ගලයන් 47 දෙනෙක් ජීවිතක්ෂයට පත්වෙලා තියෙනවා කියලත් වාර්තා වෙනවා.
පසුගිය ජූනි මාසයේදී පමණක් රෝගීන් 21,538ක් වාර්තා වෙලා තියෙන අතර, ජූලි මාසයේ මුල් දින 12 ඇතුළතදීත් රෝගීන් 12,692ක් වාර්තා වෙලා තියෙනවා. මේ අනුව බලද්දී රෝග ව්යාප්තියේ වේගය තවමත් අඩු වෙලා නැහැ කියන එක පැහැදිලියි. වැඩිම රෝගීන් සංඛ්යාවක් වාර්තා වෙලා තියෙන්නේ බස්නාහිර පළාතෙන් වන අතර එම සංඛ්යාව 35,823ක්. ඊට අමතරව දකුණු පළාතෙන් 10,657ක්, සබරගමුව පළාතෙන් 5,756ක් සහ මහනුවර දිස්ත්රික්කයෙන් 5,560ක් වශයෙන් රෝගීන් වාර්තා වෙලා තියෙනවා.
මේ තත්ත්වය හමුවේ තමන්ගේ නිවස සහ අවට පරිසරය පිරිසිදුව තබා ගැනීම ඉතාම වැදගත්. මදුරුවන් බෝවෙන ස්ථාන විනාශ කරලා, උණ රෝගයක් වැළඳුණොත් ඉක්මනින්ම වෛද්ය උපදෙස් ලබාගන්න කියලා සෞඛ්ය අංශ ජනතාවගෙන් ඉල්ලා සිටිනවා. විශේෂයෙන්ම ළමයින් සහ වැඩිහිටියන් ගැන වැඩි අවධානයක් යොමු කරලා, මේ වසංගත තත්ත්වයෙන් ආරක්ෂා වෙන්න හැමෝම වගකීමෙන් කටයුතු කරන්න ඕනේ.

Discussion & Feedback