හොලිවුඩයේ ජනප්‍රිය අධ්‍යක්ෂකවරයෙක් වන ඩෑන් ට්‍රැක්ටන්බර්ග්ගේ අලුත්ම ඇනිමේෂන් චිත්‍රපටය ගැන මේ දවස්වල ලොකු කතාබහක් ඇතිවෙලා තියෙනවා. ‘ෆ්‍රෙඩී ද 13ත්’ නමින් හැඳින්වෙන මෙම සජීවීකරණ චිත්‍රපටය පවුලේ සැමට එකට වාඩිවෙලා බලන්න පුළුවන් විදියේ භීෂණ සහ හාස්‍ය මුසු කතාවක් විදියට තමයි නිර්මාණය වෙන්නේ. යෙහුඩි මර්කාඩෝගේ කොමික් පොතක් ඇසුරින් නිර්මාණය වන මෙම චිත්‍රපටය 2028 වසරේ ඔක්තෝබර් 13 වැනිදා සිකුරාදා දින ලොව පුරා තිරගත කිරීමට පැරාමවුන්ට් ඇනිමේෂන් ආයතනය තීරණය කරලා තියෙනවා.
මේ කතාවේ සිදුවෙන්නේ පවුලේ අයත් එක්ක නිවාඩුවක් ගත කරන්න යන අතරතුර සිදුවන අමුතුම සිදුවීමක් ගැනයි. විනෝදකාමී මාමා කෙනෙක් වන ෆ්‍රෙඩී අතින් අත්වැරදීමකින් ‘බූගිමන්’ නම් භයානක චරිතය මියයන අතර, ඉන්පසුව එම චරිතයේ බලතල ෆ්‍රෙඩීට ලැබෙනවා. මේ සිදුවීමත් එක්ක මුළු පවුලම මුහුණ දෙන අභියෝග සහ විහිළු තහළු තමයි චිත්‍රපටය පුරාම දකින්න ලැබෙන්නේ. 10 ක්ලෝවර්ෆීල්ඩ් ලේන් සහ ප්‍රෙඩේටර් වැනි නිර්මාණ හරහා ප්‍රසිද්ධියට පත් ඩෑන් ට්‍රැක්ටන්බර්ග් සහ යෙහුඩි මර්කාඩෝ එකතුව අධ්‍යක්ෂණය කරන මේ චිත්‍රපටය ගැන සිනමා ලෝලීන් ලොකු බලාපොරොත්තුවකින් ඉන්නේ.
පැරාමවුන්ට් සමාගම සමඟ ඇති කරගත් නව ගිවිසුමකට අනුව මෙම නිර්මාණය සිදු කෙරෙන අතර, මෙය පවුලේ සැමටම එකසේ රසවිඳිය හැකි PG ශ්‍රේණියේ චිත්‍රපටයක් ලෙසයි ඔවුන් හඳුන්වා දෙන්නේ. භීෂණය සහ හාස්‍යය එකට මුසු කරමින් නිර්මාණය වන මෙම සිනමා සිත්තම ඉදිරි වසර කිහිපයේදී සිනමා ලෝකයේ ලොකු ආන්දෝලනයක් ඇති කරාවි කියලා තමයි බොහෝ දෙනා විශ්වාස කරන්නේ.
Discussion & Feedback