Y Combinator ආයතනයේ සහය ලබන Corgi නම් ඉන්ෂුවරන්ස් ටෙක් ස්ටාර්ට්අප් සමාගම මේ දිනවල ලොකු ආන්දෝලනයකට ලක්වෙලා තියෙනවා. ඒ Papermark නම් සමාගම විසින් ඔවුන්ගේ මෘදුකාංගය සොරකම් කරලා තියෙනවා කියලා චෝදනා කිරීමත් එක්කයි. Papermark හි සම-නිර්මාතෘ මාර්ක් සීට්ස්, Corgi සමාගමේ අලුත් ‘Dataroom’ නිෂ්පාදනය ඔවුන්ගේ මෘදුකාංගයේ පිටපතක් බව පවසමින් සමාජ මාධ්ය ඔස්සේ සාක්ෂි සහිතව චෝදනා කළා. විශේෂයෙන්ම මෘදුකාංගයේ තිබෙන වචන සහ විශේෂාංග එකම ආකාරයට තිබීම නිසා බොහෝ දෙනෙක් මේ චෝදනාව ඇත්තක් කියලා විශ්වාස කළා.
කෙසේ වෙතත්, Corgi සමාගමේ ප්රධාන විධායක නිලධාරී නිකෝ ලාක්වා මේ චෝදනා දැඩිව ප්රතික්ෂේප කරනවා. ඔහු පවසන්නේ ඔවුන් කිසිදු කේතයක් (code) Papermark වෙතින් ලබාගෙන නැති බවයි. ‘Vibe-coding’ තාක්ෂණය භාවිත කිරීමේදී අහම්බෙන් සමානකම් ඇති වුණා මිසක් සොරකම් කිරීමක් සිදු නොවූ බව ඔහු පැහැදිලි කරනවා. කෙසේ වෙතත්, මේ සිදුවීමත් එක්ක තාක්ෂණික ලෝකයේ අලුත් ප්රශ්නයක් මතු වෙලා තියෙනවා. ඒ තමයි, කෘත්රිම බුද්ධිය භාවිත කරලා වෙනත් කෙනෙක්ගේ නිර්මාණයක පෙනුම සහ ක්රියාකාරීත්වය පහසුවෙන් පිටපත් කරන්න පුළුවන් නම්, නීතිමය වශයෙන් කේතය සමාන නොවුණත් එය සදාචාරාත්මකව කොයිතරම් දුරට සාධාරණද කියන එක.
දැනට Corgi සමාගම තමන්ගේ කීර්තිනාමය ආරක්ෂා කරගන්න උත්සාහ කරන අතර, මාර්ක් සීට්ස්ගේ එම චෝදනාත්මක පෝස්ට් එක ඉවත් කරන ලෙස ඉල්ලා නීතිමය ලිපියක් පවා යවා තිබෙනවා. මේ සිදුවීම තාක්ෂණික ක්ෂේත්රයේ බුද්ධිමය දේපළ අයිතිය සම්බන්ධයෙන් ලොකු කතාබහක් ඇති කරලා තියෙනවා.

Discussion & Feedback