ලෝකයේ පරිසරය සහ ඉඩම් අයිතිය වෙනුවෙන් හඬ නගන ක්රියාකාරීන් සඳහා ලොව භයානකම කලාපය බවට ලතින් ඇමරිකාව පත්වෙලා තියෙනවා. ‘ග්ලෝබල් විට්නස්’ සංවිධානය නිකුත් කරපු අලුත්ම වාර්තාවකට අනුව, පසුගිය වසරේදී ලොව පුරා පරිසර ක්රියාකාරීන් 124 දෙනෙක් ඝාතනයට ලක්වෙලා තියෙනවා. ඉන් වැඩිම පිරිසක් එනම් 39 දෙනෙක් කොලොම්බියාවෙන් වාර්තා වන අතර, බ්රසීලය 26 දෙනෙකු සමඟ දෙවන ස්ථානයේ පසුවෙනවා. මේ ඝාතනවලින් 85%ක්ම සිදුවෙලා තියෙන්නේ ලතින් ඇමරිකානු කලාපය තුළ වීම විශේෂත්වයක්.
බොහෝ විට මේ ඝාතන සිදුවෙන්නේ ඉඩම් ආරවුල් සහ නීතිවිරෝධී කණ්ඩායම්වල බලපෑම් නිසයි. කොලොම්බියාවේ මියගිය අයගෙන් අඩක්ම ආදිවාසී කණ්ඩායම්වලට අයත් අයයි. ඔවුන් තමන්ගේ භූමිය ආරක්ෂා කරගන්න උත්සාහ කළත්, කොකේන් නිෂ්පාදනයට අවශ්ය කොකා වගාව සහ නීතිවිරෝධී පතල් කැණීම් සිදුකරන සන්නද්ධ කණ්ඩායම්වල ඉලක්ක බවට ඔවුන් පත්වෙනවා. පසුගිය සතියේදීත් කොලොම්බියාවේ කෞකා කලාපයේ ආදිවාසී ආරක්ෂක සාමාජිකයෙක් වධහිංසා පමුණුවා ඝාතනය කර තිබුණා.
ලෝක මට්ටමින් බැලුවහම 2024 වසරට සාපේක්ෂව 2025 දී ඝාතන සංඛ්යාව තරමක් අඩු වුණත්, වාර්තා නොවන සිදුවීම් විශාල ප්රමාණයක් තියෙන්න පුළුවන් කියලා එම සංවිධානය අනතුරු අඟවනවා. ආසියානු කලාපයෙන් වැඩිම ඝාතන සංඛ්යාවක් වාර්තා වෙන්නේ පිලිපීනයෙනුයි. පරිසරය වෙනුවෙන් පෙනී සිටින මිනිසුන්ගේ ජීවිත මෙතරම් අවදානමක තිබීම ලෝකයටම ලොකු අභියෝගයක් වෙලා තියෙනවා.

Discussion & Feedback