දකුණු කොරියාවේ ප්‍රසිද්ධ CJ ENM ආයතනයට අයත් Mnet නාලිකාව සහ ලෝක ප්‍රකට Universal Music Group හි Republic ආයතනය එකතු වෙලා අලුත්ම ජාත්‍යන්තර K-pop ගර්ල් ගෲප් එකක් හදන්න ලෑස්ති වෙනවා. ‘Girls Planet 2027’ කියලා නම් කරලා තියෙන මේ ව්‍යාපෘතිය හරහා ලෝකේ හැම තැනකින්ම දක්ෂතා තියෙන තරුණියන්ව හොයාගෙන, ඔවුන්ව ලෝක මට්ටමේ තරු බවට පත් කරන්න තමයි මේ දෙගොල්ලෝම සැලසුම් කරන්නේ. කලින් තිබුණු ‘Girls Planet 999’ සහ ‘Boys II Planet’ වගේ සාර්ථක ව්‍යාපෘතිවලින් පස්සේ, මේ අලුත්ම වැඩසටහන ගැන ලෝකේ පුරාම ඉන්න K-pop රසිකයන් ලොකු බලාපොරොත්තුවකින් ඉන්නේ.
මේ වෙනකොටත් මේ සඳහා අයදුම්පත් භාරගැනීම ආරම්භ වෙලා තියෙනවා. දැනටමත් ලෝකේ වටේම ඉන්න තරුණියන් 36,000කට වඩා මේ සඳහා අයදුම් කරලා තියෙනවා, ඒක Mnet ඉතිහාසයේ වාර්තාගත ඉහළම අගයක්. 2013 ජනවාරි 1ට කලින් ඉපදුණු ඕනෑම කෙනෙක්ට මේකට අයදුම් කරන්න පුළුවන් වගේම, කොරියානු, ඉංග්‍රීසි, ජපන්, චීන සහ ස්පාඤ්ඤ භාෂාවලින් අයදුම්පත් ඉදිරිපත් කරන්නත් පහසුකම් සලසලා තියෙනවා. විශේෂයෙන්ම අගෝස්තු මාසයේ ලොස් ඇන්ජලීස් නුවර පැවැත්වෙන KCON LA 2026 උත්සවයේදීත් මේ සඳහා සෘජු සම්මුඛ පරීක්ෂණ පැවැත්වෙනවා.
මේ ව්‍යාපෘතියේ ප්‍රධාන අරමුණ වෙන්නේ ලෝකේ හැම කොනකම ඉන්න දක්ෂතා තියෙන අයව එකතු කරගෙන, ඔවුන්ව ජාත්‍යන්තර වේදිකාවට ගෙනියන එකයි. කලින් මේ වගේම ව්‍යාපෘතියකින් බිහිවුණු ‘Alpha Drive One’ කණ්ඩායම ඉතා කෙටි කාලයකින් ලෝකේ පුරාම ජනප්‍රිය වුණා වගේම, ඔවුන්ගේ පළමු ඇල්බමයත් වාර්තාගත විකුණුම් ප්‍රමාණයක් වාර්තා කළා. ඒ නිසා මේ අලුත් ගර්ල් ගෲප් එකත් ඉදිරියේදී K-pop සංගීත ක්ෂේත්‍රයේ ලොකු පෙරළියක් කරයි කියලා තමයි හැමෝම බලාපොරොත්තු වෙන්නේ.
Discussion & Feedback