චීනයේ නැන්ජින් නගරයේ ආර්ථික සංවර්ධන අංශයේ ඉහළ නිලධාරියෙක් විදිහට කටයුතු කරපු යැං යූලින් කියන පුද්ගලයාට එරෙහිව චීන අධිකරණය මගින් මරණ දඬුවම නියම කරලා තියෙනවා. මොහු වසර තිහක කාලයක් තුළ අමෙරිකානු ඩොලර් මිලියන 325ක දැවැන්ත අල්ලස් මුදලක් ලබාගෙන තියෙනවා. අල්ලස් ලබාගැනීමට අමතරව රාජ්ය අරමුදල් අවභාවිතය, බලය අයුතු ලෙස යොදා ගැනීම සහ මුදල් විශුද්ධිකරණය වගේ බරපතළ චෝදනා රැසක් මොහුට එල්ල වෙලා තිබුණා. චීන ජනාධිපති ෂී ජින්පින්ගේ දූෂණ විරෝධී මෙහෙයුමේ කොටසක් විදිහට තමයි මේ වැටලීම සිදුකරලා තියෙන්නේ.
අධිකරණ වාර්තාවලට අනුව, 1993 ඉඳන් 2023 දක්වා කාලය තුළ ව්යාපෘති ලබාදීම, ඉඩම් වෙන් කිරීම් සහ ව්යාපාරික කටයුතු වෙනුවෙන් මොහු මේ අතිවිශාල මුදල් කන්දරාව හොර රහසේම එකතු කරගෙන තියෙනවා. අධිකරණයේදී තමන් කරපු වැරදි ගැන පසුතැවිලි වෙන බව යැං ප්රකාශ කළත්, ඔහුට හිමිවෙන්න තියෙන දඬුවමෙන් ගැලවෙන්න බැරි වුණා. මොහුගේ පෞද්ගලික දේපළ සියල්ල රාජසන්තක කරන්නත්, අල්ලස් විදිහට ගත්ත මුදල් නැවත අය කරගන්නත් බලධාරීන් පියවර අරන් තියෙනවා. මෑත කාලයේ චීනයේ දූෂණ චෝදනා මත මරණ දඬුවම නියම වුණු තවත් ප්රබල නිලධාරියෙක් විදිහට මොහුව හඳුන්වන්න පුළුවන්.
චීනයේ දූෂණ මර්දන වැඩපිළිවෙළ යටතේ මීට කලිනුත් ලායි ෂියාඕමින් සහ ලී ජියැන්පින් වැනි ඉහළ පෙළේ නිලධාරීන්ට මරණ දඬුවම ක්රියාත්මක කරලා තියෙනවා. මේ සිදුවීමත් එක්ක චීන රජය දූෂිත නිලධාරීන්ට එරෙහිව කොයිතරම් දැඩි තීරණ ගන්නවද කියන එක ලෝකයටම පැහැදිලි වෙනවා.

Discussion & Feedback