ශ්රී ලංකාවේ මැණික් හා ස්වර්ණාභරණ ක්ෂේත්රයේ නියැලෙන වෘත්තිකයන් 29 දෙනෙකුගෙන් සමන්විත කණ්ඩායමක් ඉන්දියාවේදී පැවැත්වුණු විශේෂ පුහුණු වැඩසටහනක් සාර්ථකව නිම කරලා තියෙනවා. පසුගිය ජූලි 6 වැනිදා සිට 23 වැනිදා දක්වා රාජස්ථානයේ ජයිපූර් නුවර පිහිටි ඉන්දීය මැණික් හා ස්වර්ණාභරණ ආයතනයේදී තමයි මේ පුහුණුව ලබා දීලා තියෙන්නේ. 2025 වසරේදී ඉන්දීය අග්රාමාත්ය නරේන්ද්ර මෝදි මහතා ශ්රී ලංකාවේ සංචාරය කරපු වෙලාවේදී ශ්රී ලාංකික වෘත්තිකයන් සඳහා වාර්ෂිකව පුහුණු අවස්ථා 700ක් ලබා දෙන බවට දුන්නු පොරොන්දුවක් අනුව තමයි මේ වැඩසටහන ක්රියාත්මක වුණේ.
දින 18ක් පුරා පැවැත්වුණු මේ පුහුණුව තුළින් මැණික් හා ස්වර්ණාභරණ නිෂ්පාදන ක්රියාවලියේ නවීන තාක්ෂණය, 3D මුද්රණ තාක්ෂණය සහ නිර්මාණකරණය වගේ දේවල් ගැන ලොකු දැනුමක් ලබා ගන්න මේ අයට පුළුවන් වුණා. ඒ වගේම ජයිපූර් නුවර ප්රමුඛ පෙළේ මැණික් නිෂ්පාදන ආයතන කිහිපයකටම ගිහින් එහි වැඩ කටයුතු සිද්ධ වෙන හැටිත්, නවීන වෙළඳපොළ ප්රවණතා ගැනත් ප්රායෝගිකව ඉගෙන ගන්න මේ අයට අවස්ථාව ලැබුණා.
මේ පුහුණු වැඩසටහන හරහා දෙරටේම මැණික් හා ස්වර්ණාභරණ ක්ෂේත්ර අතර දැනුම හුවමාරු කරගන්න වගේම ආයතනික සබඳතා තවත් ශක්තිමත් කරගන්න ලොකු පිටුවහලක් ලැබෙනවා. දෙරටේම ආර්ථික සහයෝගීතාවය තවදුරටත් වර්ධනය කරමින්, වෘත්තිකයන්ගේ දක්ෂතා වැඩි දියුණු කිරීම අරමුණු කරගෙන මේ වගේ වැඩසටහන් ඉදිරියටත් ක්රියාත්මක කරන්න දෙරටම බලාපොරොත්තු වෙනවා.

Discussion & Feedback