ඇමරිකානු ජනාධිපති ඩොනල්ඩ් ට්රම්ප් කැනේඩියානු භාණ්ඩ සඳහා පැනවූ දැඩි තීරුබදු වලට ප්රතිචාර දක්වමින්, කැනඩාව විසින් ඇමරිකානු භාණ්ඩ සඳහා 50%ක් දක්වා ඉහළ බදු පැනවීමට තීරණය කර තිබෙනවා. වානේ, ගෘහ භාණ්ඩ, නැවුම් ටූනා මසුන් සහ කපු ඇඳුම් ඇතුළු ඇමරිකානු ඩොලර් බිලියන 20ක් වටිනා භාණ්ඩ රැසක් සඳහා මෙම නව බදු බලපැවැත්වෙනු ඇති. සැප්තැම්බර් 8 වැනිදා සිට ක්රියාත්මක වන මෙම පියවර, දෙරට අතර පවතින වෙළඳ ගිවිසුම් සාකච්ඡා බිඳ වැටීමත් සමඟ ඇති වූ උණුසුම් තත්ත්වයේ ප්රතිඵලයක් ලෙසයි දකින්න ලැබෙන්නේ. කැනේඩියානු මුදල් ඇමති ෆ්රැන්සුවා-පිලිප් ෂැම්පේන් පවසන පරිදි, මෙය තම රටේ කර්මාන්ත සහ සේවකයන් ආරක්ෂා කර ගැනීම සඳහා ගත් උපායමාර්ගික තීරණයක්.
මේ අතර, ඇමරිකානු ජනාධිපති ට්රම්ප් කැනඩාවට චෝදනා කරන්නේ ඔවුන් දශක ගණනාවක් තිස්සේ ඇමරිකාව රවටමින් අසාධාරණ ලෙස කටයුතු කරන බවයි. කැනේඩියානු මෝටර් රථ කර්මාන්තයට ද තීරුබදු පැනවීමට ට්රම්ප් තර්ජනය කර ඇති අතර, දෙරටේම දේශපාලන නායකයන් අතර පවතින මෙම වාග් ප්රහාර සහ වෙළඳ යුද්ධය හේතුවෙන් දෙරටේම පාරිභෝගිකයන්ට සහ ව්යාපාරිකයන්ට ඉදිරියේදී දැඩි ආර්ථික බලපෑම් එල්ල වනු ඇති බවටයි ආර්ථික විශේෂඥයන් අනතුරු අඟවන්නේ. කෙසේ වෙතත්, කැනේඩියානු රජය පවසන්නේ මෙම වෙළඳ යුද්ධයෙන් පීඩාවට පත්වන තම රටේ ව්යාපාරිකයන් සහ සේවකයන් වෙනුවෙන් කැනේඩියානු ඩොලර් බිලියන 7.5ක සහන පැකේජයක් ලබා දීමට කටයුතු කරන බවයි.

Discussion & Feedback