ප්‍රසිද්ධ මාධ්‍ය ආයතනයක් වන BuzzFeed හි නව හිමිකරු බයිරන් ඇලන් විසින් එම ආයතනයේ සේවකයන්ගෙන් 35%ක්ම සේවයෙන් පහ කිරීමට තීරණය කර තිබෙනවා. මීට මාස දෙකකට පෙර ඇලන් විසින් ඩොලර් මිලියන 120කට BuzzFeed ආයතනය මිලදී ගත් අතර, ආයතනයේ ලාභදායීතාවය ඉහළ නැංවීම සහ වියදම් පාලනය කිරීමේ අරමුණින් මෙම දැඩි තීරණය ගෙන ඇති බවයි වාර්තා වෙන්නේ. දැනට ආයතනයේ සේවකයන් 500කට වැඩි පිරිසක් සේවය කරන අතර, මෙම කප්පාදුව හරහා වාර්ෂිකව ඩොලර් මිලියන 29ත් 32ත් අතර මුදලක් ඉතිරි කර ගැනීමට ඔවුන් බලාපොරොත්තු වෙනවා.
මෙම වෙනස්කම් සිදු කරන්නේ ආයතනය තිරසාර වර්ධනයක් කරා ගෙන යාමේ අරමුණින් බව BuzzFeed නායකත්ව මණ්ඩලය සේවකයන් වෙත යොමු කළ පණිවිඩයක සඳහන් කර තිබෙනවා. HuffPost සහ Tasty වැනි ජනප්‍රිය වෙබ් අඩවි අයත් මෙම ආයතනයේ, කර්තෘ සහ තාක්ෂණික අංශවල කාර්යක්ෂමතාව වැඩි කිරීමටත්, ඉදිරියේදී ස්ට්‍රීම් කිරීමේ සේවාවන් හරහා ආදායම් උපයා ගැනීමටත් ඔවුන් සැලසුම් කරමින් ඉන්නවා. කෙසේ වෙතත්, මෙම සේවක කප්පාදුව නිසා ආයතනයට තුන්වන කාර්තුවේදී ඩොලර් මිලියන 6.5ත් 8.5ත් අතර ප්‍රතිව්‍යුහගත කිරීමේ වියදම් දැරීමට සිදුවනු ඇති බවයි SEC වෙත ඉදිරිපත් කළ වාර්තාවල දැක්වෙන්නේ.
ආයතනයේ සම-නිර්මාතෘ ජෝනා පෙරෙට්ටි මේ වන විට ප්‍රධාන විධායක නිලධාරී ධුරයෙන් ඉවත් වී BuzzFeed AI අංශයේ සභාපතිවරයා ලෙස කටයුතු කරනවා. ඉදිරි කාලයේදී ආයතනයේ ආදායම් සහ ලාභදායීතාවය කෙරෙහි වැඩි අවධානයක් යොමු කරන බවත්, අගෝස්තු 4 වැනිදා දෙවන කාර්තුවේ ආදායම් වාර්තා නිකුත් කිරීමට නියමිත බවත් සමාගම වැඩිදුරටත් පවසනවා.
Discussion & Feedback