හොලිවුඩ් සිනමාවේ අතිශය ජනප්‍රිය ‘ද මමි’ (The Mummy) චිත්‍රපට මාලාවේ රසිකයන් වසර ගණනාවක් තිස්සේ මග බලාගෙන හිටපු සුපිරි ආරංචියක් දැන් ලැබිලා තියෙනවා. ඒ තමයි, මේ චිත්‍රපට මාලාවේ ප්‍රධාන චරිතයක් වන එව්ලින් ඕ’කොනල්ගේ චරිතයට රේචල් වයිස් නැවතත් එකතු වෙලා ඉන්නවා කියන එක. ‘ද මමි 4’ චිත්‍රපටයේ රූගත කිරීම්වලදී ගත්තු නවතම ඡායාරූප කිහිපයක් අන්තර්ජාලයට නිකුත් වෙලා තියෙනවා. මේ දර්ශන දැක්කම රසිකයන් ගොඩක් සතුටින් ඉන්නේ, මොකද 2008 වසරේ නිකුත් වුණු තුන්වැනි චිත්‍රපටයේදී ඇයව දකින්න නොලැබීම රසිකයන්ට ලොකු අඩුපාඩුවක් වුණා.
මේ චිත්‍රපටය 2027 ඔක්තෝබර් 15 වැනිදා තිරගත වෙන්න නියමිතයි. රසිකයන් මේ වෙද්දී සමාජ මාධ්‍ය හරහා තවත් ලොකු ඉල්ලීමක් කරනවා. ඒ තමයි, රික් සහ එව්ලින් කියන ආදරණීය යුවළ මේ චිත්‍රපටයේදී වෙන් වෙලා ඉන්නා විදිහට කතාව ගොඩනගන්න එපා කියන එක. ඉන්දියානා ජෝන්ස් වගේ චිත්‍රපටවල වගේ ප්‍රධාන චරිත වෙන්වීම හෝ දික්කසාද වීම වැනි දේවල් මේ කතාවට කිසිසේත්ම නොගැලපෙන බවයි රසිකයන්ගේ අදහස. ඔවුන් දෙදෙනාගේ රසායනය තමයි මේ චිත්‍රපට මාලාවේ හදවත වෙලා තියෙන්නේ. ඉතින්, බ්‍රෙන්ඩන් ෆ්‍රේසර් සහ රේචල් වයිස් යළිත් එකට දකින්න ලැබීම සිනමා ලෝලීන්ට නම් ඇත්තටම ලොකු බලාපොරොත්තුවක් වෙලා තියෙනවා.
Discussion & Feedback