සමාජ මාධ්ය ජාලා අතර මේ දවස්වල ගොඩක් ජනප්රිය වෙලා තියෙන Bluesky ආයතනය තමන්ගේ පරිශීලකයන් වෙනුවෙන් හරිම වැදගත් අලුත් පහසුකමක් හඳුන්වා දීලා තියෙනවා. සාමාන්යයෙන් Bluesky එකේ අපි දාන ඕනෑම පෝස්ට් එකක් ‘Discover’ ෆීඩ් එක හරහා ඕනෑම කෙනෙක්ට දකින්න පුළුවන් විදිහට තමයි තියෙන්නේ. හැබැයි ගොඩක් අයට තමන්ගේ පෝස්ට් එකක් හදිසියේම වයිරල් වෙලා ලොකු පිරිසක් අතරට යනවාට වඩා, තමන්ගේ හිතවතුන් එක්ක විතරක් අදහස් බෙදාගන්න තමයි ඕන වෙන්නේ. ඒ නිසා තමයි මේ අලුත් ‘algorithmic opt-out’ පහසුකම ඔවුන් හඳුන්වා දීලා තියෙන්නේ.
මේ පහසුකම පාවිච්චි කරන්න ඔයාට තියෙන්නේ Bluesky ඇප් එකේ ‘Privacy and Security’ සැකසුම් වලට ගිහින් ඒ ඔප්ෂන් එක ඔන් කරගන්න විතරයි. මේක කරාට පස්සේ ඔයාගේ පෝස්ට් එකක් වුණත් Discover ෆීඩ් එකේ පෙන්නන්නේ නැහැ. ඒ වගේම මේක ඔයාගේ එකවුන්ට් එකටම සම්බන්ධ වෙලා තියෙන නිසා, එකම ප්රොටෝකෝල් එකක් පාවිච්චි කරන වෙනත් ඇප් එකකින් ඔයා පෝස්ට් එකක් දැම්මත් මේ සැකසුම ඒ විදිහටම ක්රියාත්මක වෙනවා. හැබැයි එක දෙයක් මතක තියාගන්න ඕන, මේකෙන් ඔයාගේ පෝස්ට් එක පෞද්ගලික (Private) වෙන්නේ නැහැ. ඒක තවමත් ප්රසිද්ධ පෝස්ට් එකක් විදිහටම තමයි තියෙන්නේ, හැබැයි අලුත් අය අතරට යන්නේ නැතිව ඔයාගේ දැනට ඉන්න ෆලෝවර්ස්ලාට විතරක් පේන විදිහට සීමා වෙනවා.
මේ වෙනස සම්පූර්ණයෙන්ම ක්රියාත්මක වෙන්න පැයක විතර කාලයක් ගත වෙන්න පුළුවන් කියලා තමයි සමාගම කියන්නේ. සමාජ මාධ්යවල හැමෝම වයිරල් වෙන්න දඟලන කාලෙක, තමන්ගේ පෞද්ගලිකත්වය ගැන හිතලා මෙහෙම පහසුකමක් ගේන එක ඇත්තටම අගය කරන්න ඕන දෙයක්.

Discussion & Feedback