අඟහරු ග්‍රහයාගේ අනාගත ගවේෂණ කටයුතු වඩාත් පහසු කරමින්, එහි සන්නිවේදන ජාලය ශක්තිමත් කිරීම සඳහා අමෙරිකානු ඩොලර් මිලියන 700ක වටිනාකමකින් යුත් දැවැන්ත කොන්ත්‍රාත්තුවක් ජෙෆ් බෙසෝස්ගේ බ්ලූ ඔරිජින් (Blue Origin) සමාගමට හිමිව තිබෙනවා. නාසා ආයතනය විසින් මෙම ව්‍යාපෘතිය ප්‍රකාශයට පත් කළේ අඟහරු මත සිදුවන මෙහෙයුම්වල දත්ත හුවමාරුව සහ නාවික කටයුතු වඩාත් කාර්යක්ෂම කිරීමේ අරමුණින්. 2030 වසර වන විට මෙම නව සන්නිවේදන පද්ධතිය අඟහරු කක්ෂයේ ස්ථාපිත කිරීමට නියමිතයි.
දැනට අඟහරු මත සිටින රෝවර් යානා සහ පෘථිවිය අතර දත්ත හුවමාරු කරන්නේ වසර ගණනාවකට පෙර යැවූ පැරණි චන්ද්‍රිකා මගිනුයි. නමුත් බ්ලූ ඔරිජින් සමාගම විසින් නිර්මාණය කරන මෙම නව ‘Mars Telecommunications Network’ (MTN) පද්ධතිය විශේෂයෙන්ම සන්නිවේදන කටයුතු සඳහාම පමණක් වෙන් වූවක් වීම විශේෂත්වයක්. ඔවුන්ගේ ‘Blue Ring’ තාක්ෂණය භාවිතයෙන් මෙම යානය නිර්මාණය කරන අතර, එය අඟහරු මත මිනිසුන් ගොඩබැස්වීමේ අනාගත සැලසුම්වලට විශාල පිටුවහලක් වේවි.
මෙම ව්‍යාපෘතිය යටතේ යානය සැලසුම් කිරීමේ සිට දියත් කිරීම සහ මෙහෙයුම් පාලනය කිරීම දක්වා සියලුම වගකීම් බ්ලූ ඔරිජින් සමාගම සතුයි. 2028 වසර අවසානයට පෙර මෙම යානය නාසා ආයතනය වෙත භාර දිය යුතු බවට ගිවිසුම්ගත වී තිබෙනවා. අභ්‍යවකාශ ගවේෂණ ක්ෂේත්‍රයේ නව පරිච්ඡේදයක් සනිටුහන් කරමින්, අඟහරු ග්‍රහයා වෙත වඩාත් වේගවත් සහ විශ්වාසවන්ත සන්නිවේදන සේවාවක් ලබා දීමට මෙමගින් හැකියාව ලැබෙනු ඇතැයි විද්‍යාඥයන් බලාපොරොත්තු වෙනවා.
Discussion & Feedback