ලොව පුරා රසිකයන් අතර ඉතාමත් ජනප්‍රිය වුණු ‘Beauty In Black’ ටෙලි නාට්‍ය මාලාව ගැන රසිකයන්ට සතුටුදායක ආරංචියක් ලැබිලා තියෙනවා. කලින් නෙට්ෆ්ලික්ස් ආයතනය නිවේදනය කරලා තිබුණේ තුන්වන වාරයෙන් මේ කතා මාලාව අවසන් කරන බවයි. නමුත් රසිකයන්ගේ දැඩි ඉල්ලීම සහ දෙවන වාරය ලෝකයේ රටවල් 17ක අංක එකේ ස්ථානයට පත්වෙමින් ලැබූ අතිවිශාල සාර්ථකත්වය නිසා, ඔවුන් තීරණය වෙනස් කරලා මේ කතා මාලාව සිව්වන වාරයකටත් දීර්ඝ කරන්න පියවර අරන් තියෙනවා. ටයිලර් පෙරී විසින් නිර්මාණය කරපු මේ කතා මාලාව මේ වන විටත් ලොව පුරා ප්‍රේක්ෂකයන්ගේ ආකර්ෂණය දිනාගෙන ඉවරයි.
මේ කතාව ගෙතිලා තියෙන්නේ කිමී සහ මැලෝරි කියන එකිනෙකට හාත්පසින්ම වෙනස් ජීවිත ගත කරන කාන්තාවන් දෙදෙනෙක් වටායි. තුන්වන වාරයේදී කිමී බෙලාරි පවුලේ අභ්‍යන්තර ගැටුම්වලට මැදිවෙමින් මැලෝරි සමඟ අකමැත්තෙන් වුණත් එකතු වෙන්න සිද්ධ වෙනවා. බ්ලැක්මේල් කිරීම්, පළිගැනීම් සහ සැඟවුණු රහස් මැද මේ පවුලේ අධිරාජ්‍යය කඩා වැටෙන ආකාරය ඉදිරි කොටස්වලින් බලාගන්න පුළුවන්. තමන්ගේ කතාව තවදුරටත් ඉදිරියට ගෙන යන්න ලැබීම ගැන ටයිලර් පෙරීත් තමන්ගේ සතුට ප්‍රකාශ කරලා තියෙනවා.
මේ කතා මාලාව සඳහා ටේලර් පොලිඩෝර් විලියම්ස්, ක්‍රිස්ටල් ස්ටුවර්ට් ඇතුළු විශාල නළු නිළියන් පිරිසක් රංගනයෙන් දායක වෙනවා. තුන්වන වාරය තිරගත වීමටත් පෙරම සිව්වන වාරය ගැන ලැබුණු මේ ආරංචිය නිසා රසිකයන් ඉන්නේ ලොකු උද්යෝගයකින්. ඉදිරියේදී තවත් කුතුහලය පිරුණු කොටස් රැසක් නෙට්ෆ්ලික්ස් හරහා රසිකයන්ට නැරඹීමේ අවස්ථාව ලැබෙනවා.
Discussion & Feedback