ලෝක ප්‍රකට බීබීසී (BBC) මාධ්‍ය ආයතනය මේ දිනවල දැඩි මූල්‍ය අර්බුදයකට මුහුණ දීලා ඉන්නවා. ඒ නිසාම ඔවුන්ගේ වියදම් පියවා ගන්න අලුත්ම සැලැස්මක් විදියට, බීබීසී මීඩියා ටෙක් (BBC Media Tech) අංශයේ සේවකයින් 151 දෙනෙකුට ස්වේච්ඡාවෙන් සේවයෙන් ඉවත් වීමට අවස්ථාව ලබා දීලා තියෙනවා. මේ පියවර හරහා ඉදිරි වසර කිහිපය තුළ පවුම් මිලියන 14.5ක මුදලක් ඉතිරි කරගන්න තමයි ඔවුන් බලාපොරොත්තු වෙන්නේ. ඇත්තටම මේ අංශයේ සේවකයින් 11%ක්ම ස්වේච්ඡාවෙන් ඉවත් වෙන්න කැමැත්ත පළ කරලා තිබුණත්, ආයතනය තීරණය කරලා තියෙන්නේ ඉන් 40%ක් පමණක් බාරගන්නයි.
මේ කප්පාදුව විතරක් නෙවෙයි, බීබීසී ආයතනය සමස්තයක් විදියට රැකියා 2,000ක් කප්පාදු කරලා පවුම් මිලියන 500ක් ඉතිරි කරගන්න ලොකු උත්සාහයක නිරත වෙනවා. ඒ වගේම ඉදිරියේදී ඔවුන්ගේ රූපවාහිනී සහ ගුවන් විදුලි නාලිකා කිහිපයක් වසා දැමීමටත්, ක්‍රීඩා අංශයේ වැඩසටහන් සීමා කිරීමටත් සැලසුම් කරලා තියෙනවා. බීබීසී නාලිකාව නරඹන ජනතාවගෙන් 80%කටත් අඩු පිරිසක් පමණයි වාර්ෂික බලපත්‍ර ගාස්තුව ගෙවන්නේ. මේ මූල්‍ය පරතරය පියවා ගන්න තමයි ඔවුන් මෙවැනි දැඩි තීරණවලට එළඹිලා ඉන්නේ. තාක්ෂණික අංශයේ සේවකයින්ට මේ තත්ත්වය නිසා ලොකු අවිනිශ්චිතතාවයකට මුහුණ දෙන්න සිද්ධ වෙලා තියෙනවා.
Discussion & Feedback