හොලිවුඩයේ අතිශය ජනප්‍රිය ‘ලෝන්ග්ලෙග්ස්’ (Longlegs) සහ ‘බැක්රූම්ස්’ (Backrooms) වැනි චිත්‍රපට නිෂ්පාදනය කළ ප්‍රවීණ නිෂ්පාදක ක්‍රිස් ෆර්ගියුසන් සහ ඔහුගේ ‘ඔඩ්ෆෙලෝස්’ (Oddfellows) චිත්‍රාගාරය, ලොව ප්‍රමුඛතම චිත්‍රපට සමාගමක් වන වෝනර් බ්‍රදර්ස් (Warner Bros) සමඟ විශේෂ ගිවිසුමකට අත්සන් තබා තිබෙනවා. මෙම නව හවුල්කාරිත්වය හරහා ඉදිරියේදී නිර්මාණාත්මක සහ උසස් තත්ත්වයේ චිත්‍රපට රැසක් ප්‍රේක්ෂකයන්ට දැකගන්න ලැබෙනු ඇති බවයි වාර්තා වෙන්නේ. විශේෂයෙන්ම අඩු වියදමකින් විශාල සාර්ථකත්වයක් ලබාගැනීමට සහ නවක දක්ෂතා හඳුනා ගැනීමට ෆර්ගියුසන් සතු හැකියාව වෝනර් බ්‍රදර්ස් ආයතනය ඉහළින්ම අගය කරනවා.
මෙම ගිවිසුම යටතේ වෑන්කුවර් හි පිහිටි ඔඩ්ෆෙලෝස් චිත්‍රාගාරය වෝනර් බ්‍රදර්ස් සහ නිව් ලයින් සිනමා වැනි ආයතනවල ව්‍යාපෘති සඳහා යොදා ගැනීමට නියමිතයි. මේ පිළිබඳව අදහස් දක්වමින් වෝනර් බ්‍රදර්ස් හි සභාපතිවරුන් පවසා සිටියේ, නවක නිර්මාණකරුවන් දිරිමත් කිරීමට සහ සිනමාවට අලුත් අත්දැකීම් එක් කිරීමට ක්‍රිස් ෆර්ගියුසන්ගේ මෙම දායකත්වය ඉතා වැදගත් වන බවයි. ක්‍රිස් ෆර්ගියුසන් ද පවසන්නේ වෝනර් බ්‍රදර්ස් සමඟ එක්වී සිනමා ක්ෂේත්‍රයේ නව පෙරළියක් කිරීමට තමන් දැඩි උනන්දුවකින් පසුවන බවයි.
‘ලෝන්ග්ලෙග්ස්’ අධ්‍යක්ෂ ඕස් පර්කින්ස් සහ ‘බැක්රූම්ස්’ නිර්මාණකරු කේන් පාසන්ස් වැනි ප්‍රවීණයන් පවා ක්‍රිස් ෆර්ගියුසන්ගේ කැපවීම සහ නිර්මාණාත්මක දැක්ම පිළිබඳව ඉතා ඉහළින් අගය කර තිබෙනවා. ඉදිරියේදී මෙම හවුල්කාරිත්වය හරහා ලොව පුරා සිනමා ලෝලීන්ට අමතක නොවන සිනමා අත්දැකීම් රැසක් ලැබෙනු ඇති බවටයි සිනමා විචාරකයන් විශ්වාස කරන්නේ.
Discussion & Feedback