අභ්‍යවකාශ විද්‍යාඥයන් විසින් මෑතකදී අතිශය අමුතු ග්‍රහලොවක් සොයාගෙන තියෙනවා. GJ 523b ලෙස නම් කර ඇති මෙම ග්‍රහලොව පෘථිවියට වඩා 2.5 ගුණයකින් විශාල වුණත්, එහි බර පෘථිවිය මෙන් 23 ගුණයක් වෙනවා. සාමාන්‍යයෙන් මෙතරම් විශාල ග්‍රහලෝක වටා ඝන වායුමය ස්ථරයක් තිබිය යුතු වුණත්, මෙම ග්‍රහලොව ඉතා ඝනකමින් යුත් පාෂාණමය ස්වභාවයක් ගන්නා බවයි විද්‍යාඥයන් පවසන්නේ. මෙය අභ්‍යවකාශ විද්‍යාවේ ග්‍රහලෝක නිර්මාණය වීම පිළිබඳ තිබෙන සාම්ප්‍රදායික මතවාදයන්ට ලොකු අභියෝගයක් වෙලා තියෙනවා.
නාසා ආයතනයේ TESS චන්ද්‍රිකාව මගින් මුලින්ම හඳුනාගත් මෙම ග්‍රහලොව, ඇරිසෝනාහි පිහිටි දුරේක්ෂයක් මගින් තවදුරටත් නිරීක්ෂණය කර තිබෙනවා. වයස අවුරුදු මිලියන 170ක් පමණ වන මෙම තරු පද්ධතියේ ග්‍රහලොව දින 17.75කට වරක් තම තරුව වටා ගමන් කරනවා. සාමාන්‍යයෙන් පෘථිවිය මෙන් 20 ගුණයක් බර වූ විට ග්‍රහලෝකයක් විශාල වායු ගෝලයක් එකතු කරගන්නා බව අප දන්නවා. නමුත් මෙම ග්‍රහලොව එසේ නොවීම විද්‍යාඥයන්ට ලොකු ප්‍රහේලිකාවක් වෙලා. සමහර විට ග්‍රහලෝක දෙකක් එකිනෙක ගැටීමෙන් හෝ වෙනත් අභ්‍යවකාශ සිදුවීමක් නිසා මෙහි වායුගෝලය ඉවත් වී ගොස් තිබිය හැකි බවයි පර්යේෂකයන් අනුමාන කරන්නේ.
මෙවැනි ‘මෙගා-පෘථිවි’ (mega-Earths) සොයාගැනීම මගින් විශ්වයේ ග්‍රහලෝක නිර්මාණය වන ආකාරය ගැන තවදුරටත් ගැඹුරින් අධ්‍යයනය කිරීමට විද්‍යාඥයන්ට හැකි වෙනවා. ඉදිරියේදී මෙවැනි තවත් ග්‍රහලෝක සොයාගැනීමෙන් මේවා අහඹු සිදුවීම්ද නැතිනම් විශ්වයේ සාමාන්‍ය දෙයක්ද යන්න පැහැදිලි වනු ඇති.
Discussion & Feedback