විලියම් ගිබ්සන්ගේ සුප්‍රසිද්ධ ‘නියුරෝමැන්සර්’ (Neuromancer) නවකතාව ඇසුරින් ඇපල් ටීවී ප්ලස් ආයතනය නව කතා මාලාවක් නිර්මාණය කිරීමට සූදානම් වෙනවා. සයිබර්පන්ක් විද්‍යා ප්‍රබන්ධ සාහිත්‍යයේ මූලාරම්භය ලෙස සැලකෙන මේ කෘතිය, දශක හතරකට පසුව තිරගත වීම සයිබර්පන්ක් යුගයක අවසානයක් ලෙස බොහෝ දෙනා දකිනවා. මැට්‍රික්ස්, ගෝස්ට් ඉන් ද ෂෙල් වැනි චිත්‍රපට සහ සයිබර්පන්ක් 2077 වැනි වීඩියෝ ක්‍රීඩා පවා මේ නවකතාවේ අදහස්වලින් ආභාෂය ලබා තිබෙනවා. ඒ නිසා, මේ කතා මාලාව පැමිණෙන්නේ තමන්ගෙන් බිහි වූ බොහෝ නිර්මාණ දැනටමත් ජනප්‍රිය වී අවසන් වූ පසුබිමකයි.
අසූව දශකයේදී ගිබ්සන් මේ කෘතිය ලියන විට එය හුදෙක් අනාගතය පිළිබඳ මනඃකල්පිතයක් පමණක් වුණා. නමුත් අද වන විට කෘතිම බුද්ධිය, සයිබර් අවකාශය සහ දැවැන්ත සමාගම්වල බලපෑම අපේ දෛනික ජීවිතයේම කොටසක් වෙලා. එදා දුරස්ථ අනතුරු ඇඟවීම් ලෙස පෙනුණු දේවල් අද අපේ සමාජයේ ප්‍රධාන මාතෘකා බවට පත්වෙලා තියෙනවා. ඒ නිසාම, අද මේ කතා මාලාව නරඹන විට අපට දැනෙන්නේ එය හුදෙක් ප්‍රබන්ධයක් නොව අපේ වර්තමානයම පිළිබිඹු කරන කැඩපතක් වගෙයි. මේ අනුව, නියුරෝමැන්සර් ඇපල් ටීවී ඔස්සේ විකාශය වීම සයිබර්පන්ක් ප්‍රභේදයේ නව පරිච්ඡේදයක ආරම්භය මෙන්ම පැරණි යුගයක අවසානයක් ලෙසත් හඳුන්වන්න පුළුවන්.
Discussion & Feedback