ලොව පුරා රසිකයන් නොඉවසිල්ලෙන් බලා සිටින ‘ද ප්‍රින්සස් ඩයරීස් 3’ (The Princess Diaries 3) චිත්‍රපටය පිළිබඳව ප්‍රධාන නිළි ඇන් හැතවේ අලුත්ම තොරතුරු ටිකක් බෙදාගෙන තියෙනවා. ඇය කියන විදිහට, මේ චිත්‍රපටයේ පිටපත සම්බන්ධයෙන් මීට කලින් වැඩ කරමින් හිටියත්, අලුත් දිශාවකට යන්න හිතාගෙන ඒ සියල්ලම මුල ඉඳන්ම වෙනස් කරන්න සිද්ධ වෙලා තියෙනවා. හැබැයි මේ වෙනස ගැන කණ්ඩායම ගොඩක් සතුටින් ඉන්නේ. ඇය කියන විදිහට ඔවුන්ට දැන් කතාවේ ලොකු පෙරළියක් හෙවත් ‘ස්ටෝරි බ්‍රේක්ත්‍රූ’ එකක් ලැබිලා තියෙනවා. ඒ නිසා මේ පාර එන චිත්‍රපටය රසිකයන් බලාපොරොත්තු වෙන විදිහටම ඉතාම සාර්ථක එකක් වේවි කියලා ඇය විශ්වාස කරනවා.
මේ දවස්වල ඇන් හැතවේ ඇගේ පවුලේ වැඩකටයුතු සහ තුන්වැනි දරුවා ලැබීම නිසා ටිකක් කාර්යබහුල වෙලා ඉන්නවා. ඒ නිසා චිත්‍රපටය රූගත කිරීම් පටන් ගන්නා නිශ්චිත දිනයක් ගැන තාම කියන්න බැරි බවත් ඇය සඳහන් කරනවා. කොහොම වුණත්, මේ චිත්‍රපටය අධ්‍යක්ෂණය කරන්න අදේල් ලිම් සම්බන්ධ වෙලා ඉන්න අතර, මීට කලින් ආපු චිත්‍රපට දෙකේම තිබුණු ජනප්‍රියත්වය නිසා මේ තුන්වැනි කොටසත් ඉතාම ඉහළ මට්ටමකින් නිර්මාණය කරන්න තමයි ඔවුන් උත්සාහ කරන්නේ. මියා තර්මොපොලිස්ගේ චරිතය හරහා නැවතත් ප්‍රේක්ෂකයන් අතරට එන්න ඇන් හැතවේ සූදානම් වෙන මේ චිත්‍රපටය ගැන රසිකයන් ඉන්නේ ලොකු බලාපොරොත්තුවකින්.
Discussion & Feedback