ඇමරිකා එක්සත් ජනපදය බිහිවී වසර 250ක් ගතවන මේ මොහොතේ, ඔවුන් අභ්‍යවකාශ ගවේෂණයේ දැවැන්ත පෙරළියක් කර තිබෙනවා. සඳ මත මිනිසුන් ගොඩබැස්සවීමේ සිට අභ්‍යවකාශ මධ්‍යස්ථාන පවත්වාගෙන යාම දක්වා ඔවුන් ගමන් කර ඇති දුර අතිමහත්. දැන් බොහෝ දෙනෙක් කතා වෙන්නේ තවත් වසර 250කින්, එනම් ඇමරිකාවේ 500 වැනි උපන්දිනය වන විට අභ්‍යවකාශයේ තත්ත්වය කොහොම වෙයිද කියන එක ගැනයි. අද වන විටත් ස්පේස්-එක්ස් වැනි සමාගම් හරහා අභ්‍යවකාශ සංචාරක ව්‍යාපාරය සහ අන්තර්ජාල සේවා අභ්‍යවකාශයේ සිට ලබා දීම ආරම්භ කරලයි තියෙන්නේ.
අනාගතයේදී අභ්‍යවකාශය තුළම භාණ්ඩ නිෂ්පාදනය කිරීමේ කර්මාන්තය ඉතා දියුණු වේවි කියලා විද්‍යාඥයන් විශ්වාස කරනවා. විශේෂයෙන්ම බර රහිත පරිසරයකදී ඖෂධ නිෂ්පාදනය කිරීමේ හැකියාව ඉතා ඉහළයි. දැනටමත් ඇතැම් සමාගම් අභ්‍යවකාශයේදී ඖෂධ වර්ග සාර්ථකව අත්හදා බලා තිබෙනවා. මීට අමතරව, ග්‍රහක (Asteroids) තුළ ඇති වටිනා ලෝහ සහ ජලය ලබා ගැනීම හරහා අභ්‍යවකාශයේම ඉන්ධන පිරවුම්හල් ඇති කර ගැනීමටත් මිනිසාට හැකි වේවි. මේ හරහා සෞරග්‍රහ මණ්ඩලයේ තවත් ගැඹුරට ගමන් කිරීමට අපට අවස්ථාව ලැබෙනවා.
අභ්‍යවකාශ ආර්ථිකයක් ගොඩනැගීම අනාගතයේදී ලෝකයේ ප්‍රධානම ඉලක්කය බවට පත්වේවි. රොබෝවරුන්ගේ සහය ඇතිව අභ්‍යවකාශයේ සම්පත් ගවේෂණය කිරීමෙන් මිනිසාට අලුත් ලෝකයක් විවෘත වේවි. කෙසේ වෙතත්, මේ සියල්ල සාර්ථක කර ගැනීමට නම් අභ්‍යවකාශයේ සිටින රොබෝවරුන් සහ මිනිසා අතර හොඳ සම්බන්ධතාවයක් පවත්වා ගැනීමත් අත්‍යවශ්‍ය කාරණයක් බවයි විශේෂඥයන් පෙන්වා දෙන්නේ.
Discussion & Feedback