ජනප්‍රිය පොඩ්කාස්ටර්වරියක් වන ඇලෙක්ස් කූපර් සහ මැට් කැප්ලන් විසින් ආරම්භ කරන ලද ‘අන්වෙල්’ (Unwell) මාධ්‍ය සමාගම මේ වන විට ඇමරිකානු ඩොලර් මිලියන 500ක දැවැන්ත වටිනාකමකට ළඟා වී තිබෙනවා. පැට්‍රික් වයිට්සෙල්ගේ ප්‍රධානත්වයෙන් යුත් WTSL ආයතනය විසින් මෙම සමාගම වෙත සිදුකළ නවතම ආයෝජනයත් සමඟයි ඔවුන් මෙම ඉහළ වටිනාකම ලබාගෙන තියෙන්නේ. 2023 වසරේදී ආරම්භ කළ මෙම සමාගම කෙටි කාලයක් තුළ මාධ්‍ය ක්ෂේත්‍රයේ විශාල පෙරළියක් කිරීමට සමත් වෙලා තියෙනවා.
අන්වෙල් සමාගමේ ප්‍රේක්ෂක පිරිසෙන් 89%ක්ම කාන්තාවන් වන අතර, ඔවුන්ගෙන් බහුතරයක් වයස අවුරුදු 18ත් 35ත් අතර පසුවන තරුණියන් වීම විශේෂත්වයක්. දැනට ඔවුන් විවිධ සමාජ මාධ්‍ය වේදිකා ඔස්සේ මිලියන 100කට අධික අනුගාමිකයන් පිරිසක් සමඟ සම්බන්ධ වී සිටිනවා. පොඩ්කාස්ට් වැඩසටහන් දහයකට අධික ප්‍රමාණයක් පවත්වාගෙන යන ඔවුන්, සිරිස් එක්ස්.එම් (SiriusXM) වැනි දැවැන්ත ආයතන සමඟ ද හවුල්කාරිත්වයන් ඇති කරගෙන තියෙනවා. වීඩියෝ මාධ්‍ය ඔස්සේ සිය අන්තර්ගතයන් තවදුරටත් පුළුල් කිරීමට ඔවුන් මේ වන විටත් පියවර ගනිමින් ඉන්නවා.
මේ සම්බන්ධයෙන් අදහස් දක්වමින් ඇලෙක්ස් කූපර් පවසා සිටියේ, WTSL ආයතනයේ සහයෝගය ලැබීමත් සමඟ ඉදිරියේදී තවත් නව ආයෝජන සහ අත්පත් කරගැනීම් හරහා සමාගම තවදුරටත් වර්ධනය කිරීමට බලාපොරොත්තු වන බවයි. ප්‍රේක්ෂකයන්ගේ රුචිකත්වය හඳුනාගෙන ඔවුන්ට අවශ්‍ය දේ ලබාදීමට අන්වෙල් සමාගම දක්වන දක්ෂතාවය නිසාම ඔවුන්ට මෙම සාර්ථකත්වය ළඟා කර ගැනීමට හැකි වී තිබෙනවා.
Discussion & Feedback