සෙගා ඩ්‍රීම්කාස්ට් (SEGA Dreamcast) කියන්නේ ගේමින් ලෝකයේ අමතක නොවන නමක්. මේ කොන්සෝලය වෙළඳපොළෙන් ඉවත් වෙලා වසර විසිහතරක් ගත වුණත්, අදටත් ඒ වෙනුවෙන් අලුත් ක්‍රීඩා නිර්මාණය වීම පුදුම හිතෙන කාරණයක්. මේ දවස්වල අන්තර්ජාලය තුළ කතාබහට ලක්වෙලා තියෙන්නේ ‘White Creek’ කියන අලුත්ම සර්වයිවල් හොරර් (survival horror) ක්‍රීඩාව ගැනයි. ස්ටෝරි බර්ඩ් ස්ටූඩියෝස් (Story Bird Studios) විසින් නිර්මාණය කරන මේ ක්‍රීඩාව, වෙනත් පද්ධතිවලින් ඩ්‍රීම්කාස්ට් එකට පෝට් කරපු එකක් නෙවෙයි. ඒ වෙනුවෙන්ම විශේෂයෙන්ම නිර්මාණය කරපු එකක් වීම මෙහි තියෙන විශේෂත්වයයි.
මේ ක්‍රීඩාවේ ට්‍රේලරය දැක්කම අපිට තේරෙනවා මේක හරිම අමුතු, බියකරු පරිසරයක සිදුවන කතාවක් කියලා. හිමෙන් වැසුණු නගරයක සිදුවන මේ කතාවේදී, සතුරන් විනාශ කරන්න තුවක්කු වගේම විශේෂ මානසික බලයන් පවා භාවිතා කරන්න ක්‍රීඩකයන්ට පුළුවන්. Resident Evil වගේ පැරණි හොරර් ක්‍රීඩා වල තිබුණු ඒ විශේෂිත කැමරා කෝණ සහ අත්දැකීම් නැවතත් මේ හරහා අත්විඳින්න ලැබෙනවා. ඩ්‍රීම්කාස්ට් එකක් නැති අයට වුණත් මේ ක්‍රීඩාව PS4, PS5, ස්විච් සහ පීසී (PC) හරහා ලබාගන්න පුළුවන්.
පැරණි ක්‍රීඩා වලට ආදරේ කරන අයට නම් මේක ඇත්තටම සුපිරි ආරංචියක්. ඩ්‍රීම්කාස්ට් එකේ තියෙන සීමිත හැකියාවන් උපරිමයෙන් භාවිතා කරමින් නිර්මාණය කරපු මේ ක්‍රීඩාව, රෙට්‍රෝ ගේමින් ලෝකයේ අලුත් පෙරළියක් කරාවි කියලා ගොඩක් දෙනෙක් බලාපොරොත්තු වෙනවා. ඉතින් ඔයාලත් මේ වගේ පැරණි කොන්සෝල වලට ආස කෙනෙක් නම්, මේ ක්‍රීඩාව අනිවාර්යයෙන්ම අත්හදා බලන්න.
Discussion & Feedback