පෘථිවි කක්ෂයේදී අභ්‍යවකාශ යානා දෙකක් ඉතාමත් දක්ෂ ලෙස එකිනෙකට සමීපව ගමන් කරමින් සිය හැකියාවන් ලොවටම පෙන්වා තිබෙනවා. කැලිෆෝනියානු සමාගමක් වන ‘Impulse Space’ විසින් නිර්මාණය කළ ‘Mira’ නමැති මෙම යානා දෙක, මීටර් 200ක් වැනි ඉතා කෙටි දුරකින් එකිනෙක පසුකර ගොස් තිබීම විශේෂත්වයක්. මෙම අභ්‍යාසය මගින් අනාගතයේදී අභ්‍යවකාශයේදී සිදුකරන සංකීර්ණ මෙහෙයුම් සඳහා විශාල දොරටුවක් විවෘත වන බව එම සමාගමේ ප්‍රධාන විධායක නිලධාරී ටොම් මුලර් පවසනවා. මෙම යානා දෙක පසුගිය කාලයේදී ඉතා සැලසුම් සහගතව එකිනෙක දෙසට ගමන් කරමින් අවසානයේදී මෙම සුවිශේෂී ඉලක්කය සපුරා ගත්තා.
මෙම ‘Mira’ යානා නිර්මාණය කර තිබෙන්නේ පාරිභෝගික භාණ්ඩ අභ්‍යවකාශයේ නියමිත ස්ථානවලට ප්‍රවාහනය කිරීම සඳහායි. පිඟන් සෝදන යන්ත්‍රයක ප්‍රමාණයේ මෙම යානා, කිලෝග්‍රෑම් 300ක් දක්වා බරක් රැගෙන යාමට හැකියාව තිබෙනවා. මෙම මෙහෙයුම සාර්ථක කර ගැනීම සඳහා ‘Starfish Space’ සහ ‘HEO’ යන සමාගම්වල සහයෝගයත් ලැබී තිබෙන අතර, යානා දෙක එකිනෙක සමීප වූ අවස්ථාවේදී ඒවායේ තිබූ කැමරා මගින් එකිනෙකාව ඡායාරූප ගත කිරීමටත් ඔවුන් සමත් වුණා. අභ්‍යවකාශයේදී මෙවැනි දක්ෂ ලෙස හැසිරවිය හැකි යානා තිබීම ඉදිරියේදී අභ්‍යවකාශ ගවේෂණ කටයුතු වඩාත් පහසු සහ කාර්යක්ෂම කරනු ඇති බවයි විද්‍යාඥයින් පවසන්නේ.
Discussion & Feedback