ලොව පුරා රසිකයින්ගේ ආදරය දිනාගත් හැරී පොටර් සිනමාපට මාලාවේ අවසාන කොටස වන ‘හැරී පොටර් ඇන්ඩ් ද ඩෙත්ලි හැලෝස්: පාට් 2’ තිරගත වී මේ වන විට වසර 15ක් ගතවෙලා. 2001 වසරේදී ආරම්භ වුණු මේ සිනමා ගමන, හොලිවුඩ් ඉතිහාසයේ කිසිදු බාධාවකින් තොරව සාර්ථකව අවසන් වුණු විශිෂ්ටතම නිර්මාණයක් විදිහට හඳුන්වන්න පුළුවන්. ඩැනියෙල් රැඩ්ක්ලිෆ්, එමා වොට්සන් සහ රූපට් ග්‍රින්ට් වැනි නළු නිළියන්ගේ දශකයක කැපවීම සහ විවිධ අධ්‍යක්ෂකවරුන්ගේ දායකත්වය නිසා මේ සිනමාපට මාලාව අදටත් ෆැන්ටසි ගණයේ ඉහළින්ම තියෙනවා. විශේෂයෙන්ම අවසාන සිනමාපටය ඇමරිකානු ඩොලර් බිලියන 1.3කට වඩා වැඩි ආදායමක් ලබමින් වාර්තා පොත් අතරට එක් වුණා.
දැන් HBO ආයතනය විසින් හැරී පොටර් කතා මාලාව නැවතත් රූපවාහිනී කතා මාලාවක් විදිහට නිර්මාණය කරන්න සූදානම් වෙනවා. පොත්වල තියෙන බොහෝ දේවල් සහ මගහැරුණු චරිත මේ හරහා වඩාත් විස්තරාත්මකව ඉදිරිපත් කරන්න ඔවුන් බලාපොරොත්තු වෙනවා. නමුත්, මුල් සිනමාපට මාලාව රසිකයින්ගේ හදවතේ තියෙන තැනට ළඟා වීම ඔවුන්ට ලොකු අභියෝගයක් වේවි. කොහොම වුණත්, අලුත් නිර්මාණය කොයි වගේ වේවිද කියලා බලාගෙන ඉන්න රසිකයින්ට, ඕනෑම වෙලාවක ආයෙත් පරණ සිනමාපට ටික නරඹලා ඒ සුන්දර මතකයන් අලුත් කරගන්න පුළුවන්.
Discussion & Feedback