ඇමරිකානු අභ්‍යවකාශ හමුදාව විසින් දියත් කළ අතිශය වැදගත් ‘වික්ටස් හේස්’ (Victus Haze) මෙහෙයුම ඉතා සාර්ථකව අවසන් කිරීමට ඔවුන් සමත් වුණා. මේ මෙහෙයුමේ ප්‍රධාන අරමුණ වුණේ අභ්‍යවකාශයේදී වෙනත් චන්ද්‍රිකාවක් හඳුනාගෙන එය අන්තර්ක්‍රියා කිරීමේ හැකියාව පරීක්ෂා කිරීමයි. මේ සඳහා ‘ජැකල්’ (JACKAL) සහ ‘පූමා’ (Puma) නමින් චන්ද්‍රිකා දෙකක් යොදා ගත් අතර, පූමා චන්ද්‍රිකාව අභ්‍යවකාශගත කර පැය 17කටත් අඩු කාලයකදී මෙම මෙහෙයුම ආරම්භ කිරීමට ඔවුන්ට හැකි වුණා. නියමිත පැය 72ක කාල සීමාවට වඩා පැය 11කට කලින්ම මෙම අභියෝගය ජය ගැනීමට ඔවුන් සමත් වීම විශේෂත්වයක්.
මෙම මෙහෙයුම මගින් අභ්‍යවකාශයේදී ඇති විය හැකි තර්ජන හඳුනා ගැනීම සහ ඒවාට ප්‍රතිචාර දැක්වීමේ හැකියාව ඇමරිකානු හමුදාව විසින් තහවුරු කර තිබෙනවා. විශේෂයෙන්ම, ‘ජැකල්’ චන්ද්‍රිකාව මගින් ඉලක්කගත චන්ද්‍රිකාව පසුපස හඹා ගොස් එහි රූප ලබා ගැනීම සහ එය නිරීක්ෂණය කිරීම ඉතා නිවැරදිව සිදු කළා. අනාගතයේදී අභ්‍යවකාශයේදී සිදුවිය හැකි ඕනෑම අභියෝගයකට මුහුණ දීමටත්, සතුරු චන්ද්‍රිකාවල ක්‍රියාකාරකම් පාලනය කිරීමටත් මෙම තාක්ෂණය ඉතා වැදගත් වෙනවා. පෞද්ගලික අභ්‍යවකාශ සමාගම් සමඟ එක්ව සිදු කළ මෙම මෙහෙයුම, අභ්‍යවකාශ ආරක්ෂක ක්ෂේත්‍රයේ නව පෙරළියක් බවයි විචාරකයින් පවසන්නේ.
Discussion & Feedback