ඇමරිකානු අභ්‍යවකාශ ආයතනය වන නාසා ආයතනයේ ආටෙමිස් II මෙහෙයුමට සම්බන්ධ ප්‍රධාන අභ්‍යවකාශගාමීන් දෙදෙනෙක් වන රීඩ් වයිස්මන් සහ වික්ටර් ග්ලෝවර් තමන්ගේ සක්‍රීය රාජකාරිවලින් ඉවත්වී ‘එමරිටස්’ හෙවත් ගෞරවනීය උපදේශක තත්ත්වයට පත්වීමට තීරණය කර තිබෙනවා. පසුගිය අප්‍රේල් මාසයේදී සඳ වටා සාර්ථකව ගමන් කරමින් ඉතිහාසගත වූ මෙම කණ්ඩායමේ සිටි කැනේඩියානු ජාතික ජෙරමි හැන්සන් ද මීට පෙර සිය හමුදා සක්‍රීය රාජකාරිවලින් ඉවත්වන බව නිවේදනය කළා. කෙසේ වෙතත්, මෙම කණ්ඩායමේ සිටින ක්‍රිස්ටිනා කොච් තවමත් සිය සක්‍රීය රාජකාරිවල නිරතව සිටින බවයි වාර්තා වෙන්නේ.
මෙම වෙනසත් සමඟ ඔවුන් තවදුරටත් අභ්‍යවකාශ මෙහෙයුම්වල නියමුවන් ලෙස කටයුතු නොකළත්, නාසා ආයතනයේ අනාගත ආටෙමිස් III වැනි මෙහෙයුම් සඳහා තාක්ෂණික උපදේශකවරුන් ලෙස සිය දැනුම ලබාදීමට නියමිතයි. විශේෂයෙන්ම වික්ටර් ග්ලෝවර් කැලිෆෝනියා පොලිටෙක්නික් රාජ්‍ය විශ්වවිද්‍යාලයේ පරිපාලන අංශයේ ඉහළ තනතුරකට එක්වීමට නියමිත අතර, තමන්ගේ අත්දැකීම් නව පරපුරේ සිසුන් සමඟ බෙදා ගැනීමට ලැබීම ගැන ඔහු සතුට පළ කර තිබෙනවා. රීඩ් වයිස්මන් ද අනාගත අභ්‍යවකාශ ගමන් සැලසුම් කිරීමේදී නාසා ආයතනයට අවශ්‍ය මඟ පෙන්වීම් ලබාදීමට සූදානමින් සිටිනවා. 1972 වසරෙන් පසු පෘථිවි කක්ෂයෙන් ඔබ්බට ගිය පළමු මිනිසුන් කණ්ඩායම ලෙස ඉතිහාසයට එක්වූ මොවුන්, පසුගියදා ඇමරිකානු ජනාධිපතිවරයා අතින් ‘කොන්ග්‍රස් අභ්‍යවකාශ ගෞරව පදක්කම’ ද ලබා ගත්තා.
Discussion & Feedback