ඕස්ට්‍රේලියාවේ ක්වීන්ස්ලන්ත ප්‍රාන්තයේ ෆොරස්ට් වෙරළ තීරයට අභිරහස් ලෝහමය ගෝල කිහිපයක් ගොඩගැසී තිබෙනවා. මේ පිළිබඳව පරීක්ෂණ පැවැත්වූ ඕස්ට්‍රේලියානු අභ්‍යවකාශ ඒජන්සිය පවසන්නේ, මේවා වෙනත් රටකට අයත් අභ්‍යවකාශ රොකට්ටුවක කොටස් විය හැකි බවයි. මේවා අභ්‍යවකාශයේ සිට පෘථිවි වායුගෝලයට ඇතුළු වූ රොකට් කොටස්වලට සමාන බවත්, මේවා අභ්‍යවකාශ යානයක පීඩන යාත්‍රා (pressure vessels) විය හැකි බවත් ඔවුන් වැඩිදුරටත් සඳහන් කරනවා.
මේ සම්බන්ධයෙන් මේ වන විට ජාත්‍යන්තර බලධාරීන් සමඟ සාකච්ඡා කරමින් පවතින අතර, මේවා කුමන රටකට අයත් රොකට්ටුවක කොටස්ද යන්න තහවුරු කර ගැනීමට කටයුතු කරනවා. විශේෂයෙන්ම මෑතකදී චීනය විසින් සිදු කළ රොකට් දියත් කිරීම් කිහිපයක් පිළිබඳව සැකයක් මතුව තිබුණත්, නිල වශයෙන් තවමත් කිසිවක් ප්‍රකාශ කර නැහැ. මේ දිනවල අභ්‍යවකාශයේ සිට කඩා වැටෙන මෙවැනි සුන්බුන් පිළිබඳව ලෝකයම දැඩි අවධානයකින් පසුවනවා.
ඕස්ට්‍රේලියානු බලධාරීන් ප්‍රදේශවාසීන්ට දැඩි ලෙස අවවාද කරන්නේ මේවා ස්පර්ශ නොකරන ලෙසයි. මේවා අන්තරායකර ද්‍රව්‍ය විය හැකි නිසා, මෙවැනි යමක් දුටුවහොත් වහාම බලධාරීන්ට දැනුම් දෙන ලෙස ඔවුන් ඉල්ලා සිටිනවා. අභ්‍යවකාශ සුන්බුන් පෘථිවියට කඩා වැටීම වර්තමානයේදී ලෝකයටම විශාල ගැටලුවක් වී තිබෙන අතර, මේ සිදුවීමත් සමඟ අභ්‍යවකාශයේ ආරක්ෂාව පිළිබඳව නැවතත් කතාබහක් ඇති වී තිබෙනවා.
Discussion & Feedback