අලුත්ම DCU චිත්‍රපටයක් විදිහට එළිදැක්වුණු ‘සුපර්ගර්ල්’ චිත්‍රපටය බලාපොරොත්තු වුණු මට්ටමේ ආදායම් වාර්තා තියන්න අපොහොසත් වෙලා තියෙනවා. ඩොලර් මිලියන 175ක විශාල වියදමක් දරලා හදපු මේ චිත්‍රපටය ලෝක ව්‍යාප්තව ලැබුවේ ඩොලර් මිලියන 68ක ආදායමක් විතරයි. මේ ගැන අදහස් දක්වපු DC ස්ටූඩියෝස් සම-ප්‍රධාන විධායක නිලධාරී පීටර් සැෆ්‍රන් කියන්නේ, මේ චිත්‍රපටය බලාපොරොත්තු වුණු ඉලක්ක සපුරා ගත්තේ නැති වුණත්, DCU එකේ ඉදිරි දීර්ඝකාලීන සැලසුම් ගැන තමන් තවමත් ලොකු විශ්වාසයකින් ඉන්නවා කියලයි.
මේ චිත්‍රපටය බොක්ස් ඔෆිස් අතින් අසාර්ථක වුණත්, IMAX තිරවලදී නම් සුපිරි වීර චිත්‍රපට ඉතිහාසයේ වාර්තාගත ආරම්භයක් ලබාගන්න මේකට පුළුවන් වුණා. දැන් DC රසිකයන්ගේ අවධානය යොමු වෙලා තියෙන්නේ ඉදිරියේදී එන්න තියෙන ‘ක්ලේෆේස්’ (Clayface) සහ 2027දී එළිදැක්වෙන ජේම්ස් ගන්ගේ ‘මෑන් ඔෆ් ටුමෝරෝ’ (Man of Tomorrow) චිත්‍රපට දෙසටයි. ඒ වගේම 2026දී HBO හරහා ‘ලැන්ටන්ස්’ (Lanterns) කතා මාලාවත් ප්‍රේක්ෂකයන්ට බලාගන්න පුළුවන්.
සමාජ මාධ්‍යවල නම් මේ ගැන විවිධ මත පළවෙනවා. සමහරු කියන්නේ සුපිරි වීර චිත්‍රපටවලට තියෙන උනන්දුව දැන් අඩු වෙලා කියලා. තවත් අය කියන්නේ චිත්‍රපටයේ අයවැය වැඩියි කියලා. කොහොම වුණත්, DCU එකේ අනාගතය තීරණය වෙන්නේ ඉදිරියේදී එන නිර්මාණවල ගුණාත්මකභාවය මත බවයි බොහෝ දෙනෙක් විශ්වාස කරන්නේ.
Discussion & Feedback